Jasyl jelekti jyl saıynǵy bıologıalyq óńdeý jumystary júrip jatyr
Aǵashtardyń qalypty jaǵdaıyn saqtaý jáne zıankesterge tózimdiligin arttyrý maqsatynda 14 sáýirden bastap qalanyń jasyl jelegin bıologıalyq óńdeý jumystary bastalady, - dep habarlaıdy almaty-akshamy.kz
Zıankesterge óńdeýden keıingi áserdi kúsheıtý úshin bıyldan bastap birinshi kezeńde (vegetasıa basynda) emender tórt ret, terekter eki retten óńdeletin bolady. Buǵan deıin olar bir ret qana óńdeletin, alaıda óńdeý rettiligi azdyǵynyń tıimsiz ekendigi dáleldendi jáne aǵashtardy saqtap qalýǵa múmkindik bermeıtini anyqtaldy.
Jumys barysynda adamdarǵa qustar men janýarlarǵa zıansyz, klımattyq erekshelikterdi eskere otyryp QR aýmaǵynda qoldanýǵa ruqsat etilgen sertıfıkattalǵan qaýiptiligi tómen klassqa jatatyn (P-4) bıologıalyq jáne keıbir kezderde hımıalyq preparattar qoldanylady.
Japyraq kemirgish jáne zeń aýrýlaryn qozdyrǵysh zıankesterge qarsy óńdeý jumystarymen 2,3 mln astam aǵashty qamtý josparlanǵan. Zıankester men aýrýlardyń bıologıalyq erekshelikterine qaraı óńdeý jumystary túnde jáne tańǵy ýaqytta júzege asyrylady.
Bıyl bıologıalyq óńdeý jumystary ádettegideı tórt kezeńmen júrgiziledi: 14 sáýirden 20 mamyrǵa deıin; 30 mamyrdan 30 maýsymǵa deıin; 10 shildeden 10 tamyzǵa deıin jáne 20 tamyzdan 20 qyrkúıekke deıin.