Megapolıs medısınasynda taǵy bir tyń jańalyq – Alataý aýdanynda ornalasqan №23 qalalyq emhana bazasynda Ulttyq Primary Health Care qaýymdastyǵynyń jobasy sheńberinde ashylǵan Úzdik tájirıbeler ortalyǵy resmı túrde jumysyn bastady.
– Bul mańyzdy oqıǵany alǵashqy medısınalyq-sanıtarlyq kómek júıesin nyǵaıtatyn jáne álemdik deńgeıdegi ozyq ınovasıalyq ádisterdi praktıkalyq qyzmetke engize otyryp, halyqqa medısınalyq kómek kórsetýdiń jańa tıimdi modelin qurýǵa dáneker bola alatyn úlken qadam dep baǵalaımyn. Quramynda otbasylyq dáriger, patronajdyq medbıkeler, psıhologtar, áleýmettik qyzmetkerler bar Úzdik tájirıbeler ortalyǵynyń eń basty ereksheligi – qoǵamǵa, áleýmetke, adamǵa beıimdelgen bastapqy medısınalyq-sanıtarlyq kómekti júzege asyrý. Jańa týǵan sábıden bastap egde jastaǵy adamdardyń densaýlyǵyn baqylaıtyn, zamanaýı qurylǵylarmen jabdyqtalǵan bizdiń eńseli ortalyq tórt joba sheńberinde jumys isteıtin bolady, – deıdi №23 qalalyq emhana dırektory Sáýle Ahatqyzy.
Tórt jobanyń biri «Tynyshtyq bólmesi» dep atalady. Onda kóńili synyq, jaǵdaıy bolmaı turǵan qyzmetker osy bólmede psıhologqa júginip, moraldyq jaǵdaıyn qalypqa keltirip alýyna bolady. Aldaǵy ýaqytta tek mamandarǵa ǵana emes, emhanaǵa keletin turǵyndarǵa da sondaı kómekter usynylmaq. Otbasynda nemese aınalamyzda bolyp jatqan keıbir keleńsiz oqıǵalardyń densaýlyqqa da keri áserin tıgizetinin eskersek, «Tynyshtyq bólmesiniń» paıdasy úlken bolatynyna senimdimiz.
Ekinshi joba «Erlerdiń uzaq jasaýy» úshin qyzmet kórsetpek. «Aqyldy tarazy» degen úshinshi joba da ońtaıly bolady dep otyr mamandar. Máselen, dáriger aldyna kelgen turǵyn tarazy ústinde eki mınýt kóleminde turady. Osy ýaqyt aralyǵynda dáriger onyń boıyndaǵy zat almasý prosesin mobıldi qosymsha arqyly baqylaı otyryp, nátıjeli em-dom taǵaıyndaýǵa múmkindik alady.
Al tórtinshi jobada ortalyq qyzmetkerleri sapaly alǵashqy shuǵyl medısınalyq qyzmet kórsetý daǵdylaryn úırenedi. №23 emhana janynda jeti mektep, quqyq qorǵaý organdary ornalasqan. Sondyqtan aldaǵy ýaqytta sol mekemelerdegi qyzmetkerler de osy jobaǵa qatystyrylady.
Osy oraıda aıta ketsek, 46 100 adam tirkelgen №23 emhana búgin ǵana emes, halyqqa 11 jyldan beri qyzmet kórsetip keledi. Ondaǵy mamandar Ulttyq Primary Health Care qaýymdastyǵynyń jobasy aıasynda birneshe aı boıy oqytý kýrstarynan ótken bolatyn. Nátıjesinde qala boıynsha atalǵan jobanyń barlyq talabyna sáıkes kelgen emhanaǵa búgin «Úzdik tájirıbeler ortalyǵy» degen jańa márbete berilip otyr.
Respýblıka kúni qarsańynda ashylǵan aıtýly ortalyqtyń ashylý saltanatyna Almaty qalasy men Alataý aýdany ákimdikteriniń mamandary, TMD elderinen kelgen delegasıa, sondaı-aq elimizdegi úzdik tájirıbeler ortalyqtarynyń qyzmetkerleri qatysyp, jańa da jaýapty mártebege ıe bolǵan mamandarǵa sáttilik tiledi.