Almatyda «Úzdik bilim berý uıymy» baıqaýynyń jeńimpazy marapattaldy. Almaly aýdanyndaǵy S.A.Qojyqov atyndaǵy №39 mamandandyrylǵan lıseı eń joǵary bal (1671,43) aldy, dep habarlaıdy almaty-akshamy.kz
Jeńimpazǵa bilim berý uıymyn materıaldyq-tehnıkalyq jaraqtandyrýdy jaqsartý jáne bilim berý úderisin ǵylymı-ádistemelik qamtamasyz etý úshin Almaty qalasy ákiminiń 56 mln teńge kólemindegi granty berildi. Baıqaý komısıasynyń quramyna qala ákiminiń orynbasary, Bilim basqarmasynyń ókilderi, bilim berý ardagerleri, respýblıkalyq bilim berý uıymdarynyń, qoǵamdyq uıymdardyń dırektorlary jáne t.b. kirdi.
2023 jyly baıqaý eki kezeńde ótkizildi: aýdandyq kezeń – 26 sáýirden 5 mamyrǵa deıin jáne qalalyq kezeń – 10 mamyrdan 30 maýsymǵa deıin. Birinshi kezeńde aýdandardan segiz orta bilim berý uıymy usynyldy. Olardyń ishinde: Alataý aýdanynyń №180 jalpy bilim beretin mektebi; Alataý aýdanynyń № 201 mektep-gımnazıasy; Almaly aýdanynyń S.A.Qojyqov atyndaǵy №39 mamandandyrylǵan lıseıi; Áýezov aýdanynyń A.Baıtursynov atyndaǵy №139 mektep-gımnazıasy; Bostandyq aýdanynyń Mahatma Gandı atyndaǵy №92 mamandandyrylǵan lıseıi; Jetisý aýdanynyń Súıinbaı atyndaǵy № 143 mektep-lıseıi; Naýryzbaı aýdanynyń №174 mektep-gımnazıasy; Túrksib aýdanynyń №198 jalpy bilim beretin mektebi.
Jeńimpaz birneshe krıterıı boıynsha tańdaldy. Olardyń ishinde: tehnologıalardy oqý úderisine engize bilý, muǵalimderdiń ózin-ózi júzege asyrýyna jaǵdaıdyń bolýy jáne oqýshylardyń oqýda joǵary kórsetkishteri. Ár krıterıı úshin oqý orny bal aldy.
«Orta bilim berýdiń úzdik uıymy» baıqaýynyń jeńimpazyn saltanatty marapattaý 2023 jylǵy 6 qazanda Almaty teatrynda ótti jáne Muǵalimder kúnine oraılastyryldy.