Zańbuzýshylyq saldarynan memleketke 307 mln teńgeden astam zalal kelgen
Qalalyq josparlaý jáne ýrbanıstıka basqarmasynyń burynǵy basshysy jer ýchaskelerin berý jáne obektilerdiń qurylysyn kelisý kezinde laýazymdyq ókilettikterin asyra paıdalandy degen kúdikke ilindi, dep habarlaıdy Almaty-akshamy.kz.
«Ol jeke turǵyn úı qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermeı, jekelegen qurylys kompanıalarynyń múddesi úshin 2020-2023 jyldary 3 kóppáterli turǵyn úı kesheniniń qurylysyna zańsyz kelisken. Sonyń saldarynan memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keltirildi», - delingen Antıkor habarlamasynda.
Budan basqa, 2020 jyly medısınalyq ortalyq pen HQKO-nyń qurylysyn zańsyz kelise otyryp (ınvestısıalyq jobalardy iske asyrý túrimen), múddeli tulǵalardyń jekemenshigine jer ýchaskelerin tómen quny boıynsha odan ári negizsiz berýge yqpal etken. Shyǵyn 180 mln teńgeni qurady.
Sottyń sanksıasymen kúdikti qamaýǵa alyndy.
«Qazirgi kezde sotqa deıingi tergep-tekserý jalǵasýda, basqa laýazymdy adamdardyń qatystyǵy tekserilip jatyr. Qylmystyq-prosestik kodeksiniń 201-babyna sáıkes tergeý múddesi úshin ózge de aqparat jarıa etýge jatpaıdy», - dedi vedomstvo ókilderi.