Jeńistiń 80 jyldyǵyna oraı Almatyda Uly Otan soǵysy ardagerlerine arnalǵan 8 aleıa ashyldy
Jeńistiń 80 jyldyǵyna oraı Almaty qalasynyń barlyq segiz aýdanynda bir mezgilde Uly Otan soǵysy ardagerleriniń jańa aleıasy ashyldy. Bul beıbit ómir syılaǵan batyrlarǵa degen estelik pen alǵys belgisi. İs-shara respýblıkalyq «Taza Qazaqstan» baǵdarlamasy jáne «Almaty – bizdiń ortaq úıimiz» atty qalalyq naýqan aıasynda ótti.
Negizgi aleıanyń ashylýy 28 gvardıashy-panfılovshylar saıabaǵynda ótti. Bul kúni qala ákimi Erbolat Dosaev soǵys ardagerleriniń týystarymen kezdesti. Qala basshysy ardagerler men olardyń otbasyna alǵys bildirip, qurmet kórsetti.
«Jeńistiń 80 jyldyǵyn Almatyda erekshe formatta ótkizýdi jón kórdik: qalanyń barlyq aýdanynda bir mezgilde Uly Otan soǵysy ardagerleriniń aleıasy ashyldy. Ár aýdannyń turǵyndary osy oryndardy bilip, batyrlarymyzdyń rýhyna taǵzym etýge kelip tursa deımin. Almatyda búginde 21 ardager turady – bul el boıynsha eń úlken kórsetkish. Sonymen qatar, sońǵy eki jylda ómirden ozǵan ardagerlerdi de eske alamyz. Barlyǵy 29 aǵash otyrǵyzylady. Bul aleıalar keleshek urpaq – balalar, nemereler, shóbereler úshin batyrlyqtyń sımvolyna aınalady. Olar ata-babalarynyń erligimen maqtanyp, Uly Jeńistiń qandaı baǵamen kelgenin umytpaıdy», – dedi Erbolat Dosaev.
Qala ákimi soǵys ardagerleriniń jaqyndarymen birge bıiktigi 6 metrlik iri jóke aǵashyn otyrǵyzdy. Bul aǵash beker tańdalmaǵan: jóke – ómirsheńdiktiń, myqtylyqtyń sımvoly ári kútimi jeńil. Aǵash otyrǵyzý aldynda kógaldandyrý qyzmeti aǵash dińderinen tireý qondyrmalaryn ornatyp, tamyryn sýarýǵa jaǵdaı jasaǵan. Ár aǵashtyń janyna Uly Otan soǵysy ardageriniń esimi jazylǵan taqtaısha qoıyldy.
Aǵash otyrǵyzýǵa byltyr qazanda 100 jasqa tolǵan UOS ardageri Qambar Sársenov te qatysty. Qala ákimi Erbolat Dosaev Qambar Ámirulymen jáne onyń nemereleri men shóberesimen birge estelik aǵash otyrǵyzdy.
«Bıyl Uly Jeńistiń 80 jyldyǵyn atap ótip jatyrmyz. Mundaı aleıa úshin alǵysymyz sheksiz. Bizdiń urpaq osy jerge kelip, bul aǵashtardy atalary otyrǵyzǵanyn eske alyp júredi», – dedi Qambar Ámiruly.
İs-shara kóńildi jaıly jaǵdaıda ótti. Qala ákimi ár ardagerdiń týysyna baryp, ózine jaqyn tartyp, ata-babalarynyń erligi úshin alǵys bildirip, balalarmen ázildesip, aǵash otyrǵyzýǵa jáne sý tasýǵa kómektesti. Shynaıylyqqa toly bul sát erekshe edi.
Ardagerlerdiń týystary da júrekjardy alǵys bildirdi. «Jóke – bul erekshe maǵynaly aǵash. Ol ósip, tamyryn jaıyp, bizdiń batyrlarymyzdyń máńgi esteligine aınalady. Biz bul jerge balalarmen kelip, olardyń atalary men ájeleriniń erlikteri týraly aıtyp otyramyz», – dedi soǵys ardageriniń nemeresi Iýlıa Zavadskaıa.
İs-sharaǵa Qazaqstannyń eńbek sińirgen artıseri Nurlan Abdýllın, Asylbek Eńsepov, aktrısa Janar Aıjanova, sondaı-aq, Parıj Olımpıadasynyń júldegerleri – Aleksandra Le, Narıman Qurbanov jáne Islam Sátbaev qatysty.
«Men úshin bul erekshe kún. Ákem soǵys ardageri edi, ókinishke qaraı, qazir aramyzda joq. Qaı jerde bolsam da, 9 mamyr kúni ákemniń beıitine baryp, eske alamyn. Ákem únemi: «Aspan ashyq bolsyn» deıtin. Al anam ázilmen: «Aspanda neń bar, balalaryńdy úıge ertip kel» deıtin. Qazir bul sózdiń qanshalyqty mańyzdy ekenin túsindik. Aspanymyz ashyq bolsyn, beıbitshilik pen birlik bolsyn. Barshańyzǵa amandyq tileımin», – dedi QR Eńbek sińirgen qaıratkeri Nurlan Abdýllın.
«Biz «Taza Qazaqstan» respýblıkalyq baǵdarlamasyna qatysyp jatyrmyz. Sportshylar retinde tek jeńispen emes, súıikti qalamyz Almatyny kórkeıtý arqyly da úles qosqymyz keledi. Óıtkeni, tazalyq ózimizden bastalady. Bul aksıa qalamyzdyń ekologıalyq jaǵdaıyn jaqsartýǵa kómektesedi», – dedi sportshy Islam Sátbaev.
Uly Otan soǵysy ardagerleriniń aleıasy – bul tek jasyl aımaq emes, naǵyz erliktiń eskertkishi. Sol kúni saıabaqta 29 aǵash, al 8 aleıa boıynsha jalpy 200 jóke aǵashy otyrǵyzyldy.