9 mamyr kúni 28 gvardıashy-panfılovshylar saıabaǵynda Uly Jeńistiń 80 jyldyǵyna arnalǵan aýqymdy konserttik baǵdarlama ótedi, dep habarlaıdy Aqshamnews.kz
Saıabaqtai saǵat 9:30-da Qanat Ahmetov jetekshilik etetin Memlekettik úrmeli orkestrdiń qatysýymen Máńgilik alaýǵa gúl shoqtaryn qoıý rásimi bastalady. Ardagerlerge dala asqanasynan taǵam usynylady, sondaı-aq, olar úshin arnaıy shatyrda jeke konserttik baǵdarlama uıymdastyrylady.
Saıabaqta almatylyqtar men qala qonaqtaryna arnap saǵat 09:45-ten 21:00-ge deıin basty sahnada mýzyka úzilissiz shyrqalady – merekelik konsertter kún boıy jalǵasady.
Kúndizgi baǵdarlama Almaty qalasy ákiminiń estradalyq-sımfonıalyq orkestriniń «AlJazz Symphony»-niń maestro Aleksandr Belákov basqarǵan saltanatty óner kórsetýimen bastalady. Orkestrdiń súıemeldeýimen «Sınıı platochek», «Temnaıa noch», «Eh, dorogı», «Jýravlı», «Nam nýjna odna pobeda», «Den Pobedy», «Jeńis kúni», «Soǵystan qaıtqan soldattar», «Kesteli oramal», «Álıa» jáne t.b. soǵys jyldaryndaǵy tanymal shyǵarmalar men patrıottyq ánder shyrqalady.
Baǵdarlamaǵa Qazaqstannyń tanymal ánshileri: Tólegen Rahymbaev, Venera Alpysbaeva, Oleg Tatamırov, Alekseı Tımofeev, Tolqyn Zabırova, Bereke Eńkebaeva, Baqtıar Taılaqbaev, Igor Blagodarnyı, Maqsat Samatov, sondaı-aq, Art Classic, Il Canto, La Bella vokaldy ansámblderi jáne basqalar qatysady.
Mýzykalyq estafetany «Qasymnyń ánderi-aı» konserti, Qazaqstannyń halyq artısi Talǵat Kúzembaev pen «General» tobynyń jeke konsertteri jalǵastyrady.
Saǵat 19:00-de Kóktóbe telemunarasynda Uly Otan soǵysynyń ataqty qazaqstandyq batyrlarynyń esimderi jazylǵan mýltımedıalyq Jeńis kúnine arnalǵan quttyqtaý bastalady – bul Uly Jeńis tarıhyna esimderi altyn áriptermen jazylǵan qaharmandarǵa taǵzym etý.
Saǵat 19:00-den 21:00-ge deıin kórermenderdi qazaqstandyq estrada juldyzdarynyń qatysýymen keshki konsert kútedi. Il Canto jáne La Bella kvartetteri «Smýglánka» men «Katúsha» ánderin oryndaıdy, Arkaım dýeti, «Alataý serileri» jáne «Jumyr qylysh» ansámblderi ulttyq áýen shyrqaıdy. Saı Mahambet, Erjan Maksım, Nurjan Kermenbaev, Jubanysh Jeksenuly jáne basqa da ánshiler jeke oryndaýlaryn usynady. Keshti «KeshYOU», JasStars, «Aldaspan» jáne «Jigitter» toptarynyń óneri túıindeıdi.
Jeńis ánderi 10 jáne 11 mamyr kúnderi de 28 gvardıashy-panfılovshylar saıabaǵynda ashyq aspan astynda shyrqala beredi.
10 mamyr kúni saǵat 11:00-den 15:00-ke deıin Dańq eskertkishiniń janyndaǵy sahnada «Sazgen sazy» ansambli ulttyq kúılermen, «Arqaıym» etno-toby, «MýzArt Life» ujymy, «Jeti ǵajaıyp» teatry, Sulýshash Nurmaǵanbetova, Ǵarıfa Igisinova, Erkesh Hasenov, Qazybek Ádikeı, Aqylbek Jemeneı, Óktem Altaev, Dálel Ýáshev jáne Indıra Elemes óner kórsetedi.
11 mamyr kúni saǵat 12:00-de «Eshkim de umytylmaıdy, eshnárse de umytylmaıdy!» atty konsertpen merekelik baǵdarlama jalǵasady. Sahnaǵa halyq aspaptar ansambli «Sazgen sazy», sondaı-aq, Saıat Nurǵazın, Baýyrjan Mýsın jáne Jeńis Erjanov shyǵady. Saǵat 13:00-de «Asyl» toby óner kórsetedi, al «Almaty áýenderi» artıseri Talǵat Kúzembaev, Dáýren Baıbory, Erık Tólenov, Tahmına Áshimbekova jáne Qazybek Ádikeımen dýette sońǵy bolyp óner kórsetedi.
Barshańyzdy otbasymen birge kelip, batyr babalarymyzdy eske alyp, Jeńis ánderin tyńdap, alǵys pen maqtanysh rýhynda ýaqyt ótkizýge shaqyramyz.