Qala kúni qarsańynda Alataýdyń etegindegi «Boraldaı saq qorǵandary» arheologıalyq parkinde jyl saıynǵy «Uly dala – kóshpendiler álemi» halyqaralyq etnofestıvali ótti, dep habarlaıdy almaty-akshamy.kz.
Kıiz úıler tigilip, altybaqandar quryldy, kóshpendilerdiń jaýyngerlik oıyndary kórsetildi.
– Araǵa 4 jyl salyp, festıvál qaıta jandandy. İs-sharaǵa 12 memleket qatysyp jatyr. Alǵashqy qatysýshylardyń biri bolyp Malaızıa memleketi ótinish berdi. Merekelik is-sharaǵa kelýshilerdiń sany ósip jatyr. Festıvaldi 10 myńǵa jýyq adam tamashalady. Kıiz úıler sany úsh ese artty, 40-qa jýyq meıramhana turǵyndarǵa qyzmet kórsetip jatyr. Arnaıy qoıylymdarmen shektelip qalmadyq. At úıretý, sadaq atý sıaqty oıyndar uıymdastyrylyp, shetelden kelgen ónerpazdar da ónerlerin kórsetti. Bul halyqty tánti qylyp jatyr. 500-ge jýyq ónerpaz óz ónerlerin kórsetti. Almaty qalasynyń turǵyndaryna, qala meımandaryna alǵys bildiremin. Qala basshysynyń qoldaýymen ótken is-shara qyzyqty ótip jatyr,- dedi Almaty qalasy mádenıet basqarmasynyń basshysy Ǵanı Maılybaev.
Ulttyq óner kórmeleri uıymdastyryldy. «Turan», «HasSak» etno-folklorlyq ansámblderi, Túrkıadan, Monǵolıadan, Altaı men Tyvadan, Chývashıa men Qyrǵyzstannan jáne basqa elderden kelgen tanymal artıser óz ónerlerin kórsetti.
– Qazaq bir týǵandarymyzǵa alǵys bildirgimiz keledi. Festıválge birinshi ret qatysyp jatyrmyz. Qyrǵyz elinen 30-dan astam adam keldi. Biz sadaq atý saısynda baq synastyq. Qyzdarymyz sırk pen sadaq atýdan óz ónerlerin kórsetti. Almatyda bundaı shara jyl saıyn uıymdastyrylyp jatyr. Bul degenimiz ulttyq sporttyń damýyna serpin bereri sózsiz. Almatynyń aýa raıy bizdiń elge uqsas eken. Maǵan bul shara qatty unady, – dedi sadaq atýdan jattyqtyrýshy Aslaıym Ashyrova.
Nıet bildirýshilerdiń barlyǵy túrli jarystar men vıktorınalarǵa qatysyp, baǵaly syılyqtar jáne ustalyq, zergerlik ónerdiń qupıasyna boılap, ulttyq as mázirinen dáris aldy.