Memleket basshysynyń bastamalaryn iske asyrý: Erbolat Dosaev Ulttyq quryltaı músheleriniń, máslıhat depýtattarynyń jáne sarapshylardyń qatysýymen Almaty Qoǵamdyq keńesiniń otyrysyn ótkizdi.
Almaty ákimi Erbolat Dosaev sarapshylarmen, Almaty qalasy máslıhatynyń depýtattarymen, QR Prezıdenti janyndaǵy Qoǵamdyq keńes pen Ulttyq quryltaı múshelerimen kezdesý ótkizdi. Basqosýda 2025 jylǵy 14 naýryzda ótken Ulttyq quryltaıdyń IV otyrysynda Memleket basshysy jarıalaǵan negizgi bastamalardy tıimdi júzege asyrý máseleleri qaraldy, dep habarlaıdy aqshamnews.kz
Erbolat Dosaevtyń aıtýynsha, Qazaqstan Prezıdenti Qasym-Jomart Toqaevtyń Ulttyq quryltaıdaǵy baıandamasy jan-jaqty, ol ekonomıka men áleýmettik saıasatty, sondaı-aq qazaqstandyq qoǵamnyń rýhanı damýyn qamtıtyn mańyzdy salalardy qozǵaıdy.
Memleket basshysy Táýelsizdiktiń 40 jyldyǵyna oraı el damýynyń tórt strategıalyq baǵytyn aıqyndady. Olar: sıfrlandyrý men jasandy ıntellektti damytý, energetıka, agroónerkásiptik sektordy qoldaý jáne adamı kapıtaldyń sapasyn arttyrý. Jıynǵa qatysýshylar bul basymdyqtardyń Almatyda qalaı júzege asatynyn talqylady.
Erbolat Dosaev qala ekonomıkasynyń turaqty ósýin qamtamasyz etý, áleýmettik ózgeristerdiń berik negizin qalyptastyrý, halyqtyń ómir súrý sapasyn arttyrý jáne zamanaýı ınfraqurylymdy damytý úshin qolǵa alynyp jatqan júıeli sharalar týraly aıtty.
Onyń aıtýynsha, Almaty eldiń ekonomıkalyq ortalyǵy. Qala ulttyq ekonomıkanyń 20%-dan astamyn qalyptastyryp, Qazaqstannyń barlyq kirisiniń tórtten birin qamtamasyz etedi. «Almaty – táýelsizdigimizdiń altyn besigi retinde el Prezıdenti tarapynan erekshe nazar aýdarylyp otyr. Memleket basshysy qalany jetekshi megapolıs retinde damytý boıynsha aýqymdy mindetter qoıdy», – dedi Erbolat Dosaev.
Qalalyq ákimdik aldyna qoıylǵan negizgi mindettiń biri – IT sektory men kreatıvti ındýstrıany damytý. Búginde Almaty eldegi IT qyzmetteriniń 52%-dan astamyn qamtamasyz etip otyr, bul jańa ekonomıkanyń basty qozǵaýshy kúshine aınalýda.
Áleýmettik ınfraqurylymǵa qatysty negizgi ekpin densaýlyq saqtaý salasyna qoıyldy. 2025 jyly bul salaǵa bólinetin qarjy 26%-ǵa artyp, 70,5 mlrd teńgege jetedi. Josparǵa sáıkes, 28 jańa medısınalyq nysan, onyń ishinde aýrýhanalar, perınataldyq ortalyqtar jáne emhanalar salynady. Sondaı-aq, mamyr aıynda Ortalyq Azıadaǵy jetekshi medısınalyq zertteý alańy – Ulttyq juqpaly aýrýlar ǵylymı ortalyǵy ashylady.
Qoǵamdyq keńes otyrysynda sarapshylar Memleket basshysy jarıalaǵan negizgi bastamalardy qoldaıtyndyqtaryn bildirdi.
«Ulttyq quryltaı el aldyna ǵylym men tehnologıa salasynda bıik maqsattar qoıdy. Bul turǵyda Almaty – Qazaqstannyń iri bilim jáne ǵylym ortalyǵy retinde erekshe ról atqarady. Qalada 50-den astam joǵary oqý orny, jetekshi zertteý ınstıtýttary men zerthanalar shoǵyrlanǵan. Biraq osy áleýetti saqtap qana qoımaı, ǵylym men bıznestiń ıntegrasıasyn kúsheıtý kerek. Ǵalymdardyń zertteýleri naqty sektorda qoldanylýǵa tıis. Bul baǵytta ǵylymı-zertteý klasterlerin qurý – mańyzdy qadam», – dedi Ulttyq quryltaı múshesi, Ulttyq ǵylym akademıasynyń prezıdenti Aqylbek Kúrishbaev.
Ulttyq quryltaı múshesi, «Álternatıv» ózekti zertteýler ortalyǵynyń dırektory Andreı Chebotarev Ulttyq quryltaıdy tek pikirtalas alańy ǵana emes, Qazaqstannyń saıası jańǵyrýynyń quraly dep atap ótti.
«Almaty eldegi eń iri megapolıs retinde tarıhı turǵydan qoǵamdyq belsendilik pen azamattyq bastamalardyń ortalyǵy. Bizdiń mindet – osy áleýetti saqtap qana qoımaı, bılik pen qoǵam arasyndaǵy ózara is-qımyldyń tıimdi tetikterin jasaý. Memlekettik basqarýdyń ashyqtyǵy, qoǵamdyq baqylaýdy kúsheıtý jáne saıası mádenıetti arttyrý – bul máseleler ulttyq deńgeıde de, Almaty úshin de ózekti. Qala jańa demokratıalyq basqarý standarttaryn engizýdiń úlgi alańyna aınala alady», – dedi Andreı Chebotarev.
Jıynda ekologıa máselesi de qozǵaldy. Sarapshylardyń aıtýynsha, «Taza Qazaqstan» respýblıkalyq baǵdarlamasy aıasynda júzege asyrylyp jatqan «Almaty – bizdiń ortaq úıimiz» keń aýqymdy ekologıalyq naýqany mańyzdy ról atqarady.
«Prezıdent ekologıany qorǵaýdy negizgi basymdyqtyń biri retinde belgiledi, al Almaty osy baǵytta naqty qadamdar jasaýda. «Almaty – bizdiń ortaq úıimiz» baǵdarlamasy aıasynda sońǵy eki jylda 400 myńnan astam aǵash otyrǵyzyldy, komýnaldyq ınfraqurylym jańartylyp jatyr. Bıyldyń ózinde qoqys tasymaldaýshy kólikter parki 60%-ǵa jańǵyrtyldy. Sonymen qatar, qoqysty bólek jınaý júıesi engizilip jatyr, bul ekologıalyq jaýapkershiligi joǵary qoǵam qalyptastyrý úshin mańyzdy qadam. Bul sharalar nátıjesin bere bastady, al júıeli jalǵasy qalanyń ómir súrý sapasyn jaqsartýǵa yqpal etedi», – dedi Almaty Qoǵamdyq keńesiniń tóraıymy, «Aqparattyq-resýrstyq ortalyq» qorynyń dırektory Altynaı Kóbeeva.
Jıyndy qorytyndylaǵan Erbolat Dosaev qoıylǵan mindetterdi tabysty júzege asyrý úshin memlekettik qurylymdardyń, sarapshylar qaýymdastyǵynyń jáne azamattyq qoǵamnyń belsendi ózara is-qımyly qajet ekenin atady