2024 jylǵy 27 qyrkúıekte Qazaqstan Respýblıkasy Mádenıet jáne aqparat mınıstrligi men Almaty qalasy ákimdiginiń uıymdastyrýymen Almaty qalasy ”Dostyq úıinde” «Ulttyq onomastıka: İzdenis pen tájirıbe» atty respýblıkalyq semınar ótti, dep habarlaıdy aqshamnews.kz.
İs-sharanyń maqsaty – elimizdegi ulttyq onomastıka salasyndaǵy ózekti máselelerdi talqylaý jáne osy baǵyttaǵy óńirlerdiń qyzmetin jetildirý boıynsha usynystar ázirleý.
Semınar jumysyna Qazaqstan Respýblıkasy Parlamenti Senaty men Májilisiniń depýtattary, tıisti ortalyq memlekettik jáne jergilikti atqarýshy organdardyń basshylary, Respýblıkalyq jáne Almaty qalasy onomastıka komısıalarynyń músheleri qatysty. İs-sharaǵa elimizdiń barlyq óńirlerinen onomastıka máselesine jaýapty laýazymdy tulǵalar keldi. Sonymen qatar semınarǵa qoǵamdyq uıymdardyń jetekshileri men zıaly qaýym ókilderi de shaqyryldy.
Kún tártibinde ózektendirilgen «Tarıhı tulǵalar», «Jer-sý ataýlary» jáne «Dástúrli ataýlar» tizimderi jáne ózgerister men tolyqtyrýlar engizilgen «Qazaqstan Respýblıkasyndaǵy onomastıkalyq jumystardy uıymdastyrý jónindegi ádistemelik usynymdar», óńirlerdegi onomastıkalyq ahýal, ataýlary ıdeologıalyq turǵydan eskirgen eldi mekender men olardyń quramdas bólikterin qaıta ataý jónindegi 2022-2025 jyldarǵa arnalǵan jol kartasynyń iske asyrylýy jáne taǵy da basqa mańyzdy máseleler qaraldy.
Sonymen birge semınarda eldi mekenderdiń jáne olardyń quramdas bólikteriniń baıyrǵy tarıhı ataýlaryn ǵylymı zertteý máseleleri, sondaı-aq halyq arasynda onomastıka salasyndaǵy memlekettik saıasatty túsindirý jumystaryn júrgizýge baǵyttalǵan is-sharalar da talqylandy.