70-shi jyldarda ataqty sýretshiler Moldahmet Kenbaev pen Nıkolaı Sıvchınskııdiń qolynan shyqqqan mozaıka Qazaq ulttyq qyzdar pedagogıkalyq ýnıversıtetiniń «Ulpan» asqanasynyń eki qabyrǵasynda ornalasqan.
Ókinishke qaraı, buryn qala kórkine sán bergen tańǵajaıyp týyndylardyń birqatary joıylyp ketken. Urpaqtar arasyndaǵy mádenı sabaqtastyq ónerde kórinis tabýy kerek. Sol sebepti qyzdar beınelengen monýmentaldy-sándik paneldi ýnıversıtet ujymy, QR Sýretshiler Odaǵy jáne Moldahmet Kenbaevtyń uly birlese saqtap qalmaq. Ýnıversıtet rektory Gúlmıra Qanaı joba demeýshilerine qoldaý kórsetkeni úshin alǵysyn bildirip, qalanyń mádenı murasy úshin osyndaı artefaktilerdi saqtaýdyń mańyzdylyǵyn atap ótti, dep habarlaıdy almaty-akshamy.kz Qazaq ulttyq qyzdar pedagogıkalyq ýnıversıtetiniń baspasóz qyzmetine silteme jasap.
«Asqana ǵımaratynyń buzylýyna baılanysty ýnıversıtet panelderdi qalpyna keltirýdi jáne jańa orynǵa qaıta ornatýdy josparlap otyr, sonyń arqasynda ony qala turǵyndary da kóre alady. Mozaıka tek kórkemdik qana emes, sonymen qatar tarıhı qundylyqqa ıe. Moldahmet Kenbaev pen Nıkolaı Sıvchınskıı kóptegen biregeı panelder men vıtrajdar jasap, Qazaqstannyń monýmentaldy ónerinde eleýli iz qaldyrdy. Olardyń qazaq eposyn beınelegen shyǵarmalary búginde qundy mádenı jádigerlerge aınaldy. Alaıda olardyń kópshiligi joǵalyp ketti, bizge qalǵan shyǵarmalardy saqtap qalýymyz kerek», – dep atap ótti QyzPU rektory.
Qazaq KSR Halyq sýretshisi, qazaq sýret óneriniń sardary Moldahmet Kenbaevtyń uly Alpamys Kenbaev ta sýretshi-monýmentalıst, mozaıkany qalpyna keltirý prosesine belsendi atsalysýda. Sýretshi ónerdi bolashaq urpaq úshin saqtaýdyń mańyzdylyǵyn atap ótti jáne panelderdi qalpyna keltirýge, jańa jerge ornatýǵa kómektesýge daıyn ekenin aıtty. QR Sýretshiler odaǵy da mozaıkany qalpyna keltirý úshin jobany qoldaýǵa daıyn.
«Bul mozaıkalyq panel – Qazaq ulttyq qyzdar pedagogıkalyq ýnıversıtetiniń tarıhy. Al tarıhty umytpaýymyz kerek. Bul paneldiń janynan ártúrli kezeńde qanshama stýdent, qyzmetkerler ótti. Ýnıversıtet basshylyǵyna Qazaqstan tarıhyn túsinetin adam kelgenine óte qýanyshtymyn. Jóndeý jumystary júrgizilgende mozaıkalyq panelderdiń ústinen qabyrǵa sylanǵany óte ókinishti. Bul mozaıkalyq panel – tutas bir dáýir. Tarıhty umytpaý jáne stýdentterdiń Otanǵa degen mahabbatyn oıatý, olarǵa sulýlyqty kórýdi úıretý óte mańyzdy. Olar bul súıispenshilikti oqýshylaryna da jetkizýi tıis. Qazir mozaıkany qalpyna keltirý boıynsha aýqymdy jumys kútip tur, smaltanyń tús sqemasyn barynsha tańdaý kerek. Mozaıkany bólshekteý kezinde keıbir smalttar túsip ketedi, olardy jınap, panelge qaıta bekitý kerek. Plıta jarylyp ketýi de múmkin, ony qalpyna keltirý kerek. Mozaıka qajyrly eńbekti talap etedi. Oǵan smalta, kafel, shyny sıaqty materıaldar kerek. Keıbir materıaldar ózimde saqtalǵan. Munyń bári materıaldyń túsine baılanysty. Máskeýden nemese Sankt-Peterbýrgten tapsyrys berýge týra keledi», – dedi Alpamys Kenbaev.
Ulynyń aıtýynsha, Moldahmet Kenbaev – Qazaqstanda sýret jáne keskindeme profesory ataǵyn alǵan alǵashqy qazaq.
«Ákem ónerdiń ár baǵytynda joǵary deńgeıde qyzmet etti, kóptegen jumysy Máskeý galereıalarynda jáne Qasteev murajaıynda saqtaýly. Taý eteginde jeldeı esip shapqan aq boz at beınelengen «Asaýǵa quryq salý» atty kartınasy Máskeýdegi memlekettik Tretákov galereıasynda saqtalǵan. Monýmentaldy sýretshi Nıkolaı Vladımırovıch Sıvchınskıımen uzaq ýaqyt birge jemisti eńbek etken. Mysaly, «Almaty» qonaqúıiniń qasbetine «Eńlik-Kebek» pannosy, Kóktóbeniń tórinen oryn tepken «Qolyna kádesyı ustaǵan qyz» («Sulýshash») mozaıkasy jáne Qazaqstan boıynsha salynǵan birqatar mozaıkalyq panelderi áli kúnge deıin saqtalǵan. Ókinishke qaraı, kóptegen shyǵarmasy joǵaldy. Sonda -aq ákem «Gogol» kórkemsýret ýchılıshesinde dáris berdi. Sáýlet-qurylys ınstıtýtynda «Sýret jáne keskindeme» kafedrasynyń dekany boldy. Qazaqstanda sýret jáne keskindeme profesory ataǵyn alǵan alǵashqy qazaq. Ol óner men mádenıettiń kórnekti qaıratkerlerine aınalǵan kóptegen sýretshi men sáýletshilerdi tárbıeledi», – dep atap ótti Alpamys Kenbaev.