Jumysshy mamandyqtar jyly aıasynda Almaty qalasy Týrızm jáne qonaqjaılylyq ındýstrıasy koleji bazasynda I respýblıkalyq «Ulttyq dám» baıqaýy ótti.
Baıqaý-festıvalge áleýmettik seriktester, Almaty qalasy men Almaty jáne Jambyl oblystarynyń kolej stýdentteri, óndiristik oqytý sheberleri, oqytýshylar qatysty. Baıqaýǵa 60-qa jýyq qatysýshy jınaldy, al «dámdi» is-sharany 50-den astam qonaq tamashalady.
Týrızm jáne qonaqjaılylyq ındýstrıasy kolejiniń dırektory, baıqaý uıymdastyrýshylarynyń biri N.Jabyqbaev is-sharanyń mańyzdylyǵyn atap ótti.
«Festıváldiń maqsaty – aspazdyq óner salasyndaǵy jumysshy mamandyqtardy nasıhattaý, qazaq ulttyq taǵam dástúrlerin jańǵyrtý men saqtaý, sondaı-aq aspaz mamandyǵynyń bedelin arttyryp, jastardyń shyǵarmashylyq áleýetin damytý», – dedi ol.
Iá, qazaqtyń ulttyq asqanasynyń ǵasyrlar boıy qalyptasqan dástúrin saqtaý jáne keńinen nasıhattaý, umyt qalǵan taǵam túrlerin qaıta jańǵyrtýda maqsat etken festıválde qatysýshylar «ásip», «janyshpa», «mı shujyq», «quıryq baýyr», «jent», «balqaımaq», «ýyz», «quımaq» syndy umyt bola bastaǵan taǵamdardy jańasha túrde usynýǵa tyrysty. Baıqaý sonymen qatar qazaq taǵamyn týrıser arasynda keńinen tanytýǵa, ony meıramhana ındýstrıasynda ilgeriletýge jáne aspazdyq óner salasynda ozyq tájirıbe almasýǵa yqpal etti.
«Biz – óndiristik oqytý sheberleriniń komandasy, Jambyl oblysynan keldik. Daıyndyq barysynda ulttyq dástúrimizdi zerttep, meıramhana mázirine engizýge bolatyn, zamanaýı úlgide daıyndalǵan taǵamdar ázirledik. Bul taǵamdar tek otandastarymyzǵa ǵana emes, sonymen qatar elimizdiń qonaqtary men týrıserine de unaıdy dep oılaımyz», – deıdi Taraz servıs jáne tehnologıa kolejiniń oqytýshysy M.Qurmanalıeva.
«Jandanǵan ulttyq dám» nomınasıasynyń bas júldesin Almaty qalasy Týrızm jáne qonaqjaılylyq ındýstrıasy koleji ıelendi. 1-oryn – Almaty tehnologıalyq-qarjylyq jáne ınovasıalyq-tehnologıalyq kolejine, 2-oryn – Almaty tehnologıalyq koleji men Taraz (Jambyl oblysy) servıs jáne tehnologıa kolejine, al 3-oryn Jambyl kásiptik koleji men Qaskeleń kásiptik-tehnıkalyq kolejine (Almaty oblysy) buıyrdy.
Baıqaý jeńimpazdary dıplomdarmen jáne baǵaly syılyqtarmen marapattaldy.