QR İİM Ulttyq ulanynyń ofıseri Amanǵalı Semenov qaıǵyly oqıǵanyń aldyn aldy.
Ulandyq ofıser turǵyn úıdiń tórtinshi qabatynan sekirmek bolǵan áıeldi qutqardy, dep habarlaıdy aqshamnews.kz Polisia.kz-ke silteme jasap.
Oqıǵa 16 naýryzda kúndizgi ýaqytta Almatynyń kóppáterli úıleriniń birinde bolǵan. Amanǵalı oqıǵa ornyna kezdeısoq tap bolǵan, joǵaryǵa qarap turǵan adamdardy kórip, ne bolyp jatqanyn bilmek boldy. Bul ýaqytta oqıǵa ornynda polısıa qyzmetkerleri jumys istep, áıeldi taǵdyrly qadamnan bas tartýǵa kóndirýge tyrysyp jatqan edi. Ulandyq ofıser ýaqyt joǵaltpaı, joǵarǵy qabattan arqanmen tómenge túsip, kórshi terezeden páter ishine kirdi.
Birden qonaq bólmege ótip, asqan saqtyqpen sekirgeli turǵan áıeldi artqa qaýipsiz jerge súırep shyǵardy. Áskerı qyzmetshi men polıseılerdiń kásibı áreketteriniń arqasynda qaıǵyly jaǵdaıǵa jol berilmedi. Oqıǵa ornyna kelgen dárigerler áıelge qajetti kómek kórsetti, al quzyretti organdar qazirgi ýaqytta oqıǵanyń mán-jaıyn anyqtap jatyr.