Almatydaǵy «Mega Towers» turǵyn úı kesheninde 25-qabatqa deıin bar jyldamdyqpen kóterilip baryp, úıdiń tóbesine soǵylǵan lıftini tekserý qorytyndysy belgili boldy.
Qazaqstan lıftishiler ulttyq qaýymdastyǵynyń sarapshylary men Almaty qalasynyń damý jáne komýnaldyq ınfraqurylym basqarmasynyń qyzmetkerleri birlesip lıftige tehnıkalyq tekserý júrgizdi, dep habarlaıdy Almaty-akshamy.kz QazAqparatqa silteme jasap.
«Tehnıkalyq tekserý nátıjeleri boıynsha lıft kabınasynyń toqtaı almaı qalýy tejeý mehanızminiń aqaýy saldarynan bolǵany anyqtaldy. Sondaı-aq, mashına úı-jaıyn tekserý kezinde aýa temperatýrasy barlyq ruqsat etilgen normalardan asyp, +45° kórsetken. Bul lıft jabdyqtaryn qaýipsiz paıdalanýǵa teris áser etedi», - dedi Qazaqstan lıftshiler ulttyq qaýymdastyǵynyń prezıdenti Erjan Igibaev.
Tekserý qorytyndysy boıynsha lıftige qyzmet kórsetetin «L.» kompanıasynyń lıftige qyzmet kórsetý jumystaryn júrgizý quqyǵyna ónerkásiptik qaýipsizdik komıteti beretin atestaty men ST-RK 3305-2018 lıftileri boıynsha ulttyq standartqa sáıkestigi týraly kýáligi bolmaǵany anyqtaldy.
«Bul servıstik kompanıanyń qyzmettiń osy túrimen aınalysýǵa, qyzmet kórsetýge shart jasasýǵa quqyǵy joq ekenin bildiredi», - dep túsindirdi spıker.
Qaýymdastyq basshysy atalǵan JSHS-nyń Almatynyń taǵy birneshe elıtalyq turǵyn úı kesheniniń lıftilerin kútip ustaýdy qamtamasyz etetinine alańdaýshylyq bildirdi. Onyń aıtýynsha, tekserý nátıjeleri boıynsha ýákiletti organdar ákimshilik jazalaý sharalaryn qabyldaıdy. Kompanıa basshylyǵy jaýapqa tartylýy múmkin.
«L.» kompanıasy endi lıftilerge qyzmet kórsetý jumystaryn júrgizý quqyǵyna atestat pen ulttyq standartqa sáıkestigi týraly kýálik alýy tıis. Tek sodan keıin ǵana lıftilerge qyzmet kórsetýi tıis. Osylaısha, kompanıa zańnamada kórsetilgen talaptardy oryndaıdy», - dedi Erjan Igibaev.
Sonymen qatar, spıker Almatyda lıftilerge qyzmet kórsetetin 60-qa jýyq kompanıa bar ekenin atap ótti. Alaıda, olardy tekserýde qazir qıyndyqtar bar. Sebebi, 2023 jylǵa deıin elde shaǵyn jáne orta bıznesti tekserýge moratorıı qabyldanǵan. Ol PIK, MIB, JS tóraǵalary lıftilerge qyzmet kórsetetin kompanıalarmen shart jasaspas buryn, olarda atestattyń bolýy jáne barlyq talaptardyń sáıkestigi turǵysynan tekserýi tıis dep esepteıdi.
«Meniń oıymsha, lıft — qaýipti tehnıkalyq qurylǵy. Bul jerde birinshi orynda qyzmet kórsetetin kompanıanyń kásibıligi jáne onyń tıisti bilikti personaly turýy tıis», - dep málimdedi Igibaev.
Eske salaıyq, Almatyda «Mega Towers» turǵyn úı keshenindegi lıft 25-qabatqa deıin bar jyldamdyqpen kóterilip, úıdiń tóbesine soǵylǵan bolatyn . Saldarynan jas jigit zardap shekken edi.