Almatyda ýchaskelik polısıa ınspektory Álisher Bolathanov Muratbaeva kóshesindegi úılerdiń birinde turatyn egde jastaǵy áıeldiń birneshe kún boıy páterinen shyqpaı, telefon qońyraýlaryna jaýap bermeı jatqanyn baıqap, jedel áreket etti.
Úı-úıdi aralaý barysynda bul jaǵdaıǵa kýá bolǵan ınspektor áıeldiń jalǵyz turatynyn eskerip, dereý dabyl qaqty.
Qajetti qyzmetterge habarlasyp, esikti ashýǵa shara qoldanyldy. Páterge kirgen kezde 86 jastaǵy áıel jatyn bólmede edende jatqan, esin bilgenimen qozǵala almaıtyn jaǵdaıda bolǵan. Oǵan jedel medısınalyq kómek kórsetildi.
Áıel birneshe kún buryn ózin nashar sezinip, qulap qalǵany belgili boldy. Almaly aýdandyq polısıa basqarmasynyń bastyǵy Oljas Sháripov ýchaskelik ınspektordyń jedel áreketi arqasynda áıeldiń ómiri men densaýlyǵyna tóngen qaýiptiń aldyn alǵanyn atap ótti. Qazir áıel dárigerlerdiń baqylaýynda, aýrýhanaǵa jatqyzyldy.