Áskerı daǵdylardy qalyptastyrý men jetildirý deńgeıin arttyrý úshin jergilikti áskerı basqarý organdarynyń shaqyrýymen 29219 áskerı bóliminde 120-dan asa adam qatysqan tyldy qamtamasyz etý mamandarynyń jıyny ótti, dep habarlaıdy almaty-akshamy.kz.
Daıyndyq barysynda tájirıbeli nusqaýshylardyń basshylyǵymen áskerı mindettiler áskerı sharýashylyqty júrgizý, tamaqtanýdy uıymdastyrý, kıim-keshek zattarymen qamtý jáne tyldy qamtamasyz etýdiń basqa da aspektileri boıynsha oqýdan ótti. Aspazdar, naýbaıshylar, janarmaı jabdyqtary men kıim-keshek tiginshileri, kir jýý jáne kıim-keshek sheberhanalarynyń bastyqtary, veterınarlyq feldsherler men zerthanashylar sıaqty mamandardy daıarlaýǵa erekshe nazar aýdaryldy.
QR Qarýly kúshteri Tyl bastyǵy basqarmasynyń shtab bastyǵy podpolkovnık Zańǵar Omarov, Uly Otan soǵysyna qatysýshy Vasılıı Zınchenko jáne Tyl ardagerleri áskerı mindettilerdi oqýdyń aıaqtalýymen quttyqtady. Saltanatty jaǵdaıda jıynǵa qatysýshylarǵa kezekti áskerı ataq berilip, alǵys hattar tabystaldy.
– Jıynǵa qatysý biz úshin jaqsy tájirıbe boldy. Biz bilimimizdi, mashyǵymyzdy jetildirip, dene shynyqtyrýdy jaqsarttyq, – dedi zapastaǵy leıtenant Artem Týmbaev.
Qarýly kúshterde jaýyngerlik jáne jumyldyrý daıyndyǵyn arttyrý maqsatynda áskerı jıyndar jyl saıyn ótkiziledi. Al Tyldy qamtamasyz etý salasynyń mamandaryn daıarlaý jónindegi jıyn alǵash ret uıymdastyrylyp otyr.