Almatyda túrmege tyıym salynǵan zattardy ótkizbek bolǵandar ustaldy, dep habarlaıdy Almaty-akshamy.kz Polisia.kz-ke silteme jasap.
Qylmystyq-atqarý júıesine qarasty mekemelerdegi týysqandary men jaqyndaryna sálemdeme ákelýshiler úshin tyıym salynǵan zattardy ótkizýge áreket jasaǵandarǵa qoldanylatyn jaza jaıly jazbasha eskertpeler kórneki jerde ilinip turady. Soǵan qaramastan, sottalǵandar men tergeý tutqynyndaǵylarǵa tyıym salynǵan zattardy jasyryn túrde ótkizýge tyrysatyndar kóptep kezdesedi.
Almaty qalasyndaǵy tergeý ızolátorynda 1000-nan asa tergeý tutqynyndaǵylar men sot úkiminiń kúshine ený ýaqytyn kútip jatqandar bar. Zańǵa qaıshy áreket jasap, olarǵa esirtki men uıaly telefondar jetkizýge áreket jasaıtyndar da osy mekemede jıi anyqtalady. Mysaly, jýyrda LA-155/18 mekemesiniń sálemdemelerdi qabyldaý bólmesinde konfettiń ortasyna ósimdik tektes esirtki zatyn jasyryp ákelgen T. esimdi adam ustaldy.
27 jastaǵy azamat 8 dana konfettiń ortasyna salynǵan esirtkilik zatty tergeý tutqynyndaǵy I-ǵa ákelgen. Tyıym salynǵan zatty qıturqylyq jolmen ótkizbekshi bolǵan T-nyń Almaty oblysy Qaskeleń qalasynyń turǵyny ekeni anyqtaldy.
Taǵy bir mysal – osy LA-155/18 mekemesindegi sottalǵan M-nyń atyna Aıgerim atty azamatshadan poshta arqyly kelgen sálemdemeden eki dana Nokia markaly uıaly telefony tabyldy. Aıaq kıimniń ultanyna jasyrǵan uıaly telefondardy baqylaýshylar sálemdemelerdi tekserý kezinde anyqtady.
Tergeý ızolátoryndaǵy M. QR QK-niń 188-baby 4- bóliginiń 3-tarmaqshasy boıynsha 8 jyl 11 aı merzimge sottalyp, sot úkiminiń zańdy kúshine ený merzimin kútip jatqan bolatyn. Tyıym salynǵan zattardy ótkizbekshi bolǵan áreketter kezinde Almaty qalasy Túrksib aýdandyq PB-nan jedel tereý toby shaqyrylyp, quqyq buzýshylarǵa tıisti jaza belgilenýde.