Qazaq pen túrik kınosynyń yqpaldastyǵy men ózara baılanysy nyǵaıyp keledi. Túrkıa Respýblıkasynyń Mádenıet jáne týrızm mınıstrliginiń qoldaýy jáne Túrkıanyń Almatydaǵy Bas konsýldyǵynyń kómegimen «Ierlı Dúshúnje» qaýymdastyǵy uıymdastyrǵan «9-shy Túrik fılmderi aptalyǵy - Almaty» is-sharasy ótti.
Jıynǵa Qazaqstan men Túrkıanyń kınogerleri, rejıserler, sarapshylar, kıno maıtalmandary jáne kórermender qatysty. Kıno aptalyǵyna qatysýshylar óz oı-pikirlerin ortaǵa saldy.
Túrkıanyń Almatydaǵy Bas konsýly Evren Mýdderısoǵlý eki baýyrlas memleket arasyndaǵy yntymaqtastyqtyń barlyq salalarda tabysty damyp kele jatqanyn atap ótti, onyń ishinde óner salasy da bar. Bul festıváldiń maqsaty – mádenıet pen tarıhqa nazar aýdarý.
«Kıno salasynda derekti fılmder túsirip kelemiz. Túrkıadaǵy kıno festıválderge de qatysyp júrmiz. Halyqaralyq alamandarǵa qatysý arqyly akterler men rejıserlerdi shyńdaı túsemiz. Mundaı is-sharalar bizdiń elimizge tájirıbe turǵysynan paıdaly», – dedi telejýrnalıst ári derekti fılm túsirýshi Nurlan Asqaruly.
«Men «Sońǵy kesh» atty fılmde Túrik Respýblıkasynyń alǵashqy prezıdenti Mustafa Kemal Atatúriktiń rólin somdaımyn. Bul HH ǵasyrdyń basyndaǵy mańyzdy tarıhı kezeń jaıly bıografıalyq drama. Fılmdegi oqıǵalar Túrik Respýblıkasy jarıalanar aldyndaǵy kezeńde órbıdi», – dep bólisti akter Onýr Týna.
İs-sharanyń qazaq-túrik mádenı baılanystaryn nyǵaıtýǵa tıgizer yqpaly zor ekeni anyq. Bul týraly Almaty qalasy mádenıet basqarmasy basshysy orynbasarynyń mindetin atqarýshy Arman Halbekov atap ótti.
«Ózim bul is-sharaǵa úshinshi jyl qatarynan qatysyp otyrmyn. Túrkıanyń týrısik áleýeti zor, al týrıserdi tartýda kınonyń orny erekshe. Sondyqtan bizdiń de qazaq kınosy damı bersin, sonyń nátıjesinde bizge keletin saıahattaýshylar qatary artady dep senemiz. Baýyrlas elmen mádenı baılanystardyń damýy qýantady», – dedi ol.
Bıyl túrik fılmderi qaladaǵy kınoteatrlar jelileriniń birinde 9 qazanǵa deıin kórsetiledi, ári barlyq fılmder kórermenderge tegin usynylady.