Bıylǵy jyly Almaty qalasynyń Naýryzbaı aýdanyndaǵy 8 kópqabatty úıdiń qasbeti jańartylady.
Naýryzbaı aýdanynda barlyǵy 579 kópqabatty turǵyn úı bar. Buǵan deıin «JQJK-2020» baǵdarlamasy aıasynda bes kóppáterli turǵyn úıdiń qasbetterine jóndeý jumystary júrgizilgen bolatyn. Alaıda, qazirgi ýaqytta 1960-1980 jyldar aralyǵynda salynǵan taǵy on úıdiń qasbetterin jóndeý qajet, dep habarlaıdy Almaty-akshamy.kz.
2024 jyly búdjet qarajaty esebinen segiz kópqabatty úıdiń qasbetterine aǵymdaǵy jóndeý júrgiziletin bolady. Bul joba turǵyn úılerdiń syrtqy túrin jaqsartýǵa jáne olardyń turǵyndarynyń ómir súrý sapasyn arttyrýǵa baǵyttalǵan.
Jóndeýge jatatyn úılerdiń mekenjaılary:
Qalqaman sh/a, Jansúgirov kóshesi, 31 jáne 33 úıler; Aqjar sh/a, Dáýletkereı kóshesi, 162, 166 jáne 7 úıler; Rahat sh/a, Kókdala kóshesi, 10 jáne 17 úıler, Taýsamaly sh/a, Rysqulov kóshesi, 86.
Qasbetterdi jóndeý ǵımarattardyń estetıkalyq kelbetin jaqsartyp qana qoımaıdy, sonymen qatar ǵımarattardy ylǵaldan, kógerýden jáne turǵyndardyń densaýlyǵyna teris áser etýi múmkin basqa faktorlardan qorǵaýǵa kómektesedi.
Budan basqa, ázirlengen dızaın-kod aıasynda Naýryzbaı aýdanynyń aýmaǵynda biryńǵaı sáýlettik stılge keltirilgen aqparattyq qurylystar ornatylady, sondaı-aq kóshe jıhazdary men mýraldardyń jańa elementteri paıda bolady, bul aýdanǵa biregeı jáne zamanaýı kórinis beredi.
Qazirgi ýaqytta konkýrstyq rásimder júrgizilýde, al qurylys-montaj jumystaryn 2024 jyldyń 30 qarashasyna deıin aıaqtaý josparlanýda. Bul joba Naýryzbaı aýdanynyń barlyq turǵyndary úshin neǵurlym qolaıly jáne tartymdy qalalyq orta qurýǵa baǵyttalǵan mańyzdy qadam bolyp tabylady.