Qyrkúıektiń 25-inen bastap qalanyń barlyq emhanasynda tumaýǵa qarsy ekpe egý naýqany bastalady, bul týraly Almaty Qalalyq qoǵamdyq densaýlyq saqtaý basqarmasy málimdedi, dep habarlaıdy almaty-akshamy.kz
Halyqty ımmýndaý úshin tumaýǵa qarsy «Grıppol+» vaksınasynyń 250 myń dozasy satyp alyndy.
«Grıppol+» ınaktıvasıalanǵan vaksına Reseıde óndirilgen jáne quramynda tumaý vırýsynyń A (H1N1 jáne H3N2) jáne V qosalqy tıpiniń shtamdary bar.
Egýge birinshi kezekte medısına qyzmetkerleri, medısınalyq mekemelerde esepte turǵan balalar, jetim jáne ata-anasynyń qamqorlyǵynsyz qalǵan balalar, júkti áıelder men 60 jastan asqan adamdar jatady.
Negizgi aýrýǵa baılanysty tumaýdyń neǵurlym aýyr túrine beıim adamdar da vaksınasıalanýy kerek.
Vaksınasıa naýqany qarasha aıynyń sońyna deıin jalǵasady. Tumaýǵa qarsy ekpeden keıin tolyq ımýnıtetke jetý úshin eki apta qajet. Osy ýaqyt ishinde tumaý jáne basqa vırýstyq aýrý belgisi bar adamdarmen qarym-qatynasty shektegen jón.
Dárigerler tumaý asqyný men ólim qaterine baılanysty qaýipti ekenin eske salady. Eger keıbir adam tumaýmen aýyrǵanda, birneshe kún ǵana qınalsa, tumaý nárestege, qart adamǵa jáne ımýnıteti álsiregen adamǵa juqsa, olarda aýrý qatty asqynyp, tipti ólimge ákelýi múmkin.
Vaksınasıa tumaýdyń aldyn alýdyń jáne aýyr asqynýdyń qaýpin azaıtýdyń eń jaqsy ádisi bolyp qala beredi (aýrý juqqannyń ózinde de).
Tumaýdyń aldyn alý úshin adamdar kóp jınalatyn jerge barýdy shekteý jáne úı-jaıdy únemi jeldetý usynylady. Sondaı-aq, múmkindiginshe, aýyrǵan adamdarmen qarym-qatynasty shektegen jón. Eger tumaý nemese JRVI belgileri paıda bolsa, dereý medısınalyq kómekke júginińiz.