Qazaqstannyń Halyq jazýshysy týǵan eline nebary 6 saǵattyq jerge qonys aýdardy
Muhtar Maǵaýın Túrkıanyń Kemer qalasynda turyp jatyr, dep habarlaıdy Almaty-akshamy.kz.
Bul týraly Facebook áleýmettik jelisinde jazýshy, jýrnalıs Qorǵanbek Amanjol súıinshilep habarlady. Áleýmettik jeli qoldanýshylary bul jańalyqqa jaqsy lebizderin bildirip, jazýshynyń elge oralýyna tileksetistik bildirip jatyr. Facebook-tegi bul aqparatpen jazýshynyń kelini Altyn Maǵaýına da bólisken eken.
Esterińizge sala keteıik, jazýshy Muhtar Maǵaýın buǵan deıin Amerıka Qurama Shtattarynda turdy. Al oǵan deıin qalamger 2007 jyly Chehıaǵa qonys aýdarǵan bolatyn.
Maǵaýın óz otanynan ketip, shet el asýynyń sebebin bylaı túsindirgen edi:
«Qazaqta «Arqada qys jaıly bolsa, arqar aýyp nesi bar»degen sóz bar. Men baıaǵy orystyń dıssıdentin otyrǵyzyp, jelkelep shyǵaryp salǵandaı jaǵdaıdy bastan keshkem joq, men ózim kettim. Tynysh jumys isteý kerek. Ádebıette ártúrli daý-damaı bolady. Áýezov te, Maǵjan da synǵa ushyraǵan. Alaıda maǵan qarsy úlken naýqan júrdi. Mysaly sondaı ótiriktiń biri «Juldyz» jýrnalynyń 2006 jylǵy 9 nómirinde «Muhammed paıǵambardyń áıeli Aısha anamyzǵa til tıgizgen poves basyldy» dep jazyldy. Jurttyń bári izdedi, joq ondaı nárse, jýrnal jańa ǵana shyqqan. Shyqqanyna aı bolmaǵan. Sol sıaqty nárseler. Onyń báriniń jazýyma eshqandaı áseri bolǵan joq. Biraq maǵan tynyshtyq kerek, halqyńa kerek bolmasań, bolashaq urpaqqa kereksiń, sodan keıin syrtqa ketýge týra keldi...Meniń úkimetke de, basqalarǵa da eshqandaı ókpem joq, ókpeleıtin olardyń jaǵdaıy da joq»