Almatyda týberkýlezdi dıagnostıkalaý, aldyn alý jáne emdeýdiń zamanaýı baǵdarlamalary tabysty júzege asyrylyp keledi. Bul aýrýǵa shaldyǵý men ólim-jitim deńgeı̆iniń aı̆tarlyqtaı̆ tómendeýine yqpal etti. Bul týraly óńirlik komýnıkasıalar qyzmetinde ótken baspasóz konferensıasynda QR Ulttyq ftızıopýlmonologıa ǵylymı ortalyǵynyń dırektory, QR bas ftızıatry Málik Ádenov málimdedi, dep habarlaıdy aqshamnews.kz
Sońǵy alty jylda Qazaqstanda týberkýlezge shaldyǵý 27%-ǵa, aýrýdyń taralý deńgeı̆i 32,1%-ǵa azaı̆dy. Almatyda da oń dınamıka baı̆qalady.
«Tek ótken jyldyń ózinde týberkýlezge shaldyǵý kórsetkishi 4%-ǵa tómendedi. Bul qabyldanǵan sharalardyń tıimdiligin kórsetedi», – dep atap ótti Málik Ádenov.
Qazirgi ýaqytta elde molekýlalyq-genetıkalyq dıagnostıka ádisteri engizilgen. Olar aýrýdy nebári eki saǵat ishinde anyqtaýǵa múmkindik beredi. 2024 jyly Qazaqstanda 90 myńǵa jýyq adam tekseristen ótti, olardyń 9,1%-ynda aýrý rastaldy.
«Biz halyqaralyq standarttarǵa saı̆ ekspress-dıagnostıkany belsendi túrde qoldanýdamyz. Bul aýrýdy erte kezeńde anyqtap, emdeýdi tezirek bastaýǵa kómektesedi», – dedi sarapshy.
Almatyda bir jasqa deı̆ingi balalardyń 97,4%-y BSJ ekpesin alǵan, bul Dúnıejúzilik densaýlyq saqtaý uı̆ymynyń (DDSU) standarttaryna sáı̆kes keledi. Sonymen qatar, 12 myńnan astam adam, onyń ishinde 7 myńnan astam bala aldyn alý emin qabyldady. Bul ótken jylmen salystyrǵanda 22,4%-ǵa joǵary.
«Týberkýlezdiń aldyn alý jumystaryn odan ári jalǵastyramyz, óı̆tkeni aýrýdy erte anyqtaý ony jeńil emdeýge múmkindik beredi», – dedi Málik Ádenov.
Pasıentterdiń 95%-dan astamy ıneksıasyz em qabyldaýda, al dárige tózimdi týberkýlezdiń emdeý merzimi 9-12 aı̆ǵa deı̆in qysqartylǵan. Sondaı̆-aq, Almatyda 2555 baqylaýly emdeý kabıneti jumys isteı̆di, onda myńdaǵan naýqas em alýda.
Memleket pasıentterge áleýmettik qoldaý kórsetýdi jalǵastyrýda. 2024 jyly bul maqsatqa 2,4 mlrd teńgeden astam qarjy bólinip, ambýlatorıalyq em qabyldaýshylardyń 95%-dan astamy kómek aldy.
Inovasıalyq dıagnostıka, emdeý jáne aldyn alý sharalaryn engizýdiń nátıjesinde Qazaqstan men Almatyda týberkýlezge shaldyǵý kórsetkishi turaqty túrde tómendeýde. Bul dertpen kúreske arnalǵan ulttyq strategıa halyqaralyq standarttarǵa tolyqtaı̆ sáı̆kes keledi jáne joǵary tıimdiligin kórsetip otyr