Almatyda esirtkiniń zańsyz aınalymyna qatysty 12 qylmys ashyldy
Qalada esirtkige qarsy quqyq buzýshylyqtyń aldyn alý jáne anyqtaý boıynsha qabyldanyp jatqan sharalardyń tıimdiligin arttyrý maqsatynda “Tosqaýyl” respýblıkalyq jedel-profılaktıkalyq is-sharasy ótkizildi. İs-shara kezeńinde esirtkiniń zańsyz aınalymyna qatysty 12 qylmys ashyldy. 8 keliden astam esirtki tárkilendi, onyń 7 keliden astamy – sıntetıka.
– Arnaıy is-shara nátıjesinde 31 jastaǵy azamat ustalyp, odan asa iri kólemde esirtki zattary, atap aıtqanda 500 gramnan astam kokaın, 400 gram MDMA esirtkisi jáne 31 gramnan astam mefedron tabylyp, tárkilendi. Kúdikti qamaýǵa alyndy. Sonymen qatar is-shara kezeńinde esirtki zerthanasy joıyldy, onda jalpy salmaǵy 1 keliden asatyn satýǵa daıyn turǵan “mefedron” ónimderi tabyldy. Zerthanalyq qural-jabdyqtar men sıntetıkalyq esirtki óndirýge arnalǵan túrli prekýrsorlar tárkilenip, qylmystyq is materıaldaryna qosyldy, – dedi, Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.