Almatyda 2023 jyldyń basynan bastap prokýrorlardyń aktileri boıynsha 17 mlrd teńgeden astam somaǵa 46 konkýrs joıylǵan.
Bas prokýratýra málimetinshe, 10 adam tártiptik jaýapkershilikke tartyldy, 9 memlekettik uıymnyń basshylaryna 5 mln teńgege aıyppul salynyp, ákimshilik jaýapkershilikke tartyldy, dep habarlaıdy Almaty-akshamy.kz Ulysmedia.kz-ke silteme jasap.
Tapsyrys berýshiler áleýetti ónim berýshilerge joǵary biliktilik talaptaryn qoıǵan, konkýrstyq qujattamany tolyq usynýdy qamtamasyz etpegen, satyp alý tásilin durys tańdamaǵan.
“Osy jyldan bastap, memlekettik satyp alýdy ótkizýdiń ashyqtyǵy, sybaılas jemqorlyq táýekelderin boldyrmaý maqsatynda satyp alý tásilderiniń biri reıtıńtik- baldyq júıe (RBJ) qoldanylady. Ol konkýrsqa áser etetin usynystardy, krıterıılerdi avtomatty túrde salystyrady jáne jeńimpazdy komısıanyń qatysýynsyz anyqtaıdy, ıaǵnı adamı faktorsyz, ótinimderdi usyný merzimi aıaqtalǵannan keıin memlekettik satyp alý qorytyndylary týraly hattama qalyptastyrady”, – dep túsindirdi vedomstvodan.
Sonymen qatar, Almaty qalasy prokýratýrasy monıtorıń arqyly tapsyrys berýshilerdiń biri avtojoldar salý kezinde elektrmen jabdyqtaý jelileri salasynda lısenzıalanatyn qyzmettiń bir túriniń mindetti túrde bolýy týraly kásipkerlerge negizsiz talaptar qoıǵany anyqtaldy. Bul konkýrs qorytyndylaryna áser etý retinde qarastyrylady. Prokýratýranyń qadaǵalaý aktisi boıynsha konkýrs toqtatylyp, memlekettik satyp alýǵa qatysýǵa áleýetti ónim berýshilerdiń teń sharttaryn saqtaı otyryp, qaıtadan ótkizilgen.