Almaty balalar jedel medısınalyq kómek ortalyǵynda biregeı ári kúrdeli sanattaǵy hırýrgıalyq operasıalar jasaldy.
Operasıa nesep-jynys júıesiniń ártúrli týabitken patologıasy bar balalarǵa jasaldy.
Tańdalǵan naýqastardyń eń kishisi 2 jastan asqan bolsa, eń úlkeni — 16 jasta.
Almaty qalalyq densaýlyq saqtaý basqarmasynan atap ótkendeı, 11-14 jeltoqsan aralyǵynda balalar shuǵyl medısınalyq kómek kórsetý ortalyǵynda balalar ýrologtaryna arnalǵan sheberlik synyby ótti.
Oǵan Londonnan belgili ýrologıalyq hırýrgtardyń biri doktor Imran Mýshtak arnaıy shaqyrtyldy.
«Gıpospadıa sındromy jıi kezdesedi, ony tek hırýrgıalyq ota kómegimen ǵana emdeýge bolady. Eger ota erte jasta jasalmasa, balanyń eseıýi qıynǵa soǵady, zár shyǵarý kezinde qolaısyzdyq týady, mundaı dıagnozy bar jasóspirimderge eresek ómirge ótý qıyn. Otanyń mundaı túri birden nátıjege baǵyttalmaıdy, ol balanyń jaıly áleýmettenýine jaǵdaı jasap, bolashaǵyna áser etedi», — dep atap ótti profesor Imran Mýshtak.
Profesor Imran Mýshtakqa Astana, Almaty, Qaraǵandy jáne kórshiles Mońǵolıa, Ózbekstan jáne Tájikstannan kelgen balalar hırýrgtary kómektesti.
Operasıa jasalǵan toǵyz balanyń bári palataǵa aýystyryldy, olardyń jaǵdaıy birqalypty.
«Ota kezinde plasıkalyq túzetý ádisin qoldanyp, terini aýystyrdyq: teri jamylǵylary qulaqtyń artynan alynady jáne uldarda ýretranyń anatomıalyq durys pishini jasalady. Biz bir de bir otandyq aýrýhanada jasalmaıtyn operasıalardy tańdadyq, Qazaqstannyń ár óńirinen balalar shaqyryldy. Balalar ortalyqta mamandardyń baqylaýynda bolady, bul jaǵdaıda naýqas úshin otadan keıingi kútim, alǵashqy ońaltý jáne baqylaý óte mańyzdy», — deıdi Almaty balalar jedel medısınalyq kómek kórsetý ortalyǵy ýrologıa bóliminiń meńgerýshisi Azamat Raev.