Jańa týǵan nárestelerge mereke kúnine oraı «Súıinshi» syıqoraby tartý etildi
Almatyda mereke kúnderi dúnıege kelgen 215 nárestege tabystalǵan «Súıinshi» syıqorabyna bóbekterge qajetti zattardan bólek QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan, dep habarlaıdy Almaty-akshamy.kz
«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!» - dep jazylǵan Prezıdenttiń quttyqtaýynda.
«Almaty qalasy boıynsha mereke kúnderi 215 bala dúnıege keldi. Arnaıy birneshe kún Prezıdenttiń quttyqtaýy men sábı bokstaryn jetkizý úshin, olardy daıyndaý jumystary júrgizildi", - deıdi «Azamattarǵa arnalǵan úkimet» memlekettik korporasıasy Almaty qalasy boıynsha fılıalynyń dırektory Ermek Quralbekuly Bekjúnisov.
Barlyq baby-bokstar ıelerine ýaqytyly jetkizilip, óz kezeginde analar da alǵystaryn bildirdi.
«Dúnıege sábıimiz kelip bir qýansaq, «Súıinshi» qorabyn alyp qýanyshymyz eselenip jatyr. Onyń ústine sábıimiz mereke kúni dúnıege keldi... Qýanyshymda shek joq. Prezıdenttiń ózi quttyqtaý hatyn joldap jatsa, nege qýanbasqa?! Balam Qazaqstan Respýblıkasynyń baqytty balalarynyń biri bolyp ósedi dep senemin! Ómirge alǵashqy kelgen kúnnen qurmetke ıe bolyp jatyr... Elimizde analar da, balalar da baqytty bolsyn!» - deıdi Almaty qalasynyń turǵyny Eskeldınova Gúlfıa Edilhanqyzy.
«16 jeltoqsan - mereke kúni meniń ulym dúnıege keldi. Óte baqyttymyn. Oǵan Saıan esimi berildi. Ol bizdiń úshinshi balamyz. Búgin bizge Prezıdenttiń quttyqtaýy men syılyq ákeldi. Kútpegen, keremet jaǵymdy jańalyq boldy. Qorapta ana men balaǵa qajet nárseniń bári bar. Uıymdastyrýshylarǵa rahmet! Barshańyzdy merekemen quttyqtaımyn, halqymyzǵa baqyt, órkendeý, sáttilik, densaýlyq tileımin. Elimizde bári jaqsy bolsyn!»- dedi Dınara.
Al jalpy elimiz boıynsha Táýelsizdik kúni dúnıege kelgen 2 myńnan astam sábıge baby-bokstar syıǵa tartylǵanyn aıta ketý qajet.