Mereıtoıǵa oraı medısına mekemesi analarǵa shaǵyn kádesyılar tartý etti
16 jeltoqsan – Táýelsizdik kúni Almatyda 106 sábı dúnıege keldi. Aıtýly kúni týǵan ul jáne qyz balalardyń sany teń.
Almatylyq Samal Júrsinbaı 16 jeltoqsanda N2 perzenthanada alǵash ret sábıin baýyryna basty. Ómirge shekesi torsyqtaı ul bala keldi. Otbasy músheleri sábıge batyr, ultjandy bolsyn dep Jeltoqsan qaharmany Qaırat Rysqulbektiń esimin beripti.
Osy 16 jeltoqsanda dúnıege kelgendikten, ózimizdiń qaharman Qaırat atamyzdyń atyn berip otyrmyz. Táýelsiz memleketimde osylaı balamdy qolyma alyp otyrǵanyma óte qýanyshtymyn. Balamyzdyń salmaǵy 2 keli 100 gram bolyp týyldy, – dep aǵynan jaryldy qala turǵyny Samal Júrsinbaı.
Kishkentaı Qaırat ómirge kelgen qalalyq N2 perzenthanada 16 jeltoqsan kúni 14 bala ómirge kelipti.
«Erekshe sezim boldy árıne. Sebebi Qazaqstan Táýelsizdiktiń besiginde terbelip jatqan jas memleket qoı. Táýelsizdiktiń týyn jelbiretetin kishkentaı sábılerdi merekelik kúnde, Táýelsizdigimizdiń 30 jyldyǵynda ómirge ákelip otyrǵanyma shynymdy aıtsam, óte qatty qýanyshtymyn», – deıdi jas ana Aqerke Shahan.
Dárigerlerdiń kómegimen jeńil ótti. Ekinshi balam – ul. Qazaqstan Táýelsizdiginiń 30 jyldyǵyna oraı Alla taǵala ul berdi. Shúkir. Qatty qýanyp, tolqyp turmyn, – deıdi taǵy bir jas ana Qarakóz Tarǵynova.
Mereıtoıǵa oraı medısına mekemesi analarǵa shaǵyn kádesyılar tartý etti.
«Qala boıynsha kúndelikti orta eseppen 100-den 120 balaǵa deıin dúnıe esigin ashady. Onyń ishinde shala týylǵan, egiz, aıy-kúni jetken náresteler bar. Jańa týǵan sábı men analardyń jaǵdaıy jaqsy», – dedi №2 qalalyq perzenthana bas dárigeriniń orynbasary Nazgúl Imanǵalıeva.