Táýelsizdik kúni qarsańynda megapolıs ákimi Baqytjan Saǵyntaev jumys sapary kezinde Abaı dańǵylynyń ótpeli qozǵalys ashylǵan ýchaskesin aralap kórdi, dep habarlaıdy Almaty-akshamy.kz
Abaı dańǵylynda Naýryzbaı aýdanynyń ákimshilik ortalyǵynda Momyshuly kóshesinen Alataý kóshesine deıin uzyndyǵy 3,5 km ýchaskeniń qurylysy aıaqtalýda. Eki baǵyt boıynsha kólik qozǵalysy úshin úsh jolaq qarastyrylǵan.
Áshimov kóshesiniń ústinen 400 metrlik estakada salyndy, onyń qozǵalysyn aıdyń sońyna deıin ashý josparlanýda. Bul telimde baǵdarshammen retteletin ýaqytsha qozǵalysynyń syzbasy uıymdastyrylǵan.
Abaı dańǵylyn uzartý jobasyn iske asyrý barysynda Qarǵaly ózeni arqyly da kópir salyndy. Abaı dańǵylyn qalanyń batys shekarasyna deıin uzartý kóliktiń kedergisiz ótýine múmkindik berdi.
Buǵan deıin Rysqulov dańǵyly men Emsov kóshesiniń qıylysyndaǵy jolaıryǵy ashylǵan bolatyn.
Megapolıs ákimi Baqytjan Saǵyntaev qurylysshylarǵa alǵys aıtyp, olardy aldaǵy Táýelsizdik kúnimen quttyqtady. Jumysshylar qysqa merzimde kúrdeli jobalardy aıaqtady, sonyń arqasynda kólik ınfraqurylymy jaqsaryp, qala turǵyndarynyń mobıldiligi artady.
Baqytjan Saǵyntaev salynyp jatqan Baýyrjan Momyshuly metro stansıasyn aralap kórdi, onda árleý jumystary aıaqtalyp, jabdyqtardy iske qosý-jóndeý jumystary júrgizilýde. Aǵymdaǵy jyldyń sońyna deıin Baýyrjan Momyshuly jáne Saryarqa stansıalaryn tehnıkalyq iske qosý josparlanýda.
