Qar kóshkini túsip, bir týrıs tómenge qaraı syrǵyp túsken.
Almatylyq qutqarýshylar qar kóshken kezde taýda bolǵan týrıserdi aman alyp qaldy, dep habarlaıdy Almaty-akshamy.kz QR Tótenshe jaǵdaılar mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, 2023 jylǵy 1 sáýirde saǵat 16:35-te TJM Respýblıkalyq jedel-qutqarý jasaǵynyń kezekshi-dıspecherlik bólimshesine Almaty qalasy TJD jedel kezekshisinen shaqyrý kelip túsken.
Úsh adam Býtakov asýynan Býkreev shyńyna kóterilip bara jatqan ýaqytta qar kóshkini júrip, bir týrıs tómenge qaraı syrǵyp túsken. Osyǵan baılanysty bes adamnan turatyn Respýblıkalyq jedel-qutqarý jasaǵynyń qutqarý toby kómekke attandy. Sonymen qatar, adamdardy izdeýge Almaty qalasynyń Qutqarý qyzmetiniń qutqarýshylary qosymsha jiberildi.
Respýblıkalyq jedel-qutqarý jasaǵynyń kezekshisi oqıǵa ornynyń lokasıasyn jibergen ótinish berýshimen baılanysqa shyqty. Ol týrısik marshrýt boıynsha taýǵa kóterilý kezinde qar kóshkini saldarynan joldastarynan qalyp qoıǵan. Eshqaıda júrmeı, qutqarýshylardyń kómegin kútken. Týrısermen uıaly baılanys arqyly baılanysqa shyqqan qutqarýshylar saǵat 18.43-te zardap shekkendermen vızýaldy baılanys ornatqan.
20 mınýttan keıin RJQJ qutqarý toby týrıserge jetip, zardap shekkenderdi tómenge túsirý jumystaryn bastady. Saǵat 19:55-te týrıserdi tómen túsirý jumystary aıaqtaldy, qutqarýshylar olardy Býtakov shatqalyndaǵy avtoturaqqa deıin jetkizdi. Adamdarǵa medısınalyq kómek qajet bolmady.
TJM qutqarýshylary taýda qalǵan týrıserge barlyq qaýipsizdik sharalaryn saqtaýǵa keńes beredi. Taýǵa shyqqan kezde óz kúshińizdi esepteńiz, qutqarý qyzmetteriniń aýa raıy jaǵdaılary, kóshkin qaýpi deńgeıi týraly usynystaryn eskerińiz, taýdaǵy serýenge ózińizben birge paýerbank, sý ótkizbeıtin pakettegi sirińke, sý, qosymsha jyly kıim-keshek, GPS navıgatory, t.b qajetti zattardy ala shyǵyńyz .
«Eger sizge kómek qajet bolsa, 112 nemese 8(727) 372-15-60 (TJM Respýblıkalyq jedel-qutqarý jasaǵynyń kezekshi-dıspecherlik bólimshesi) qońyraý shalyńyz», - delingen habarlamada.