Kórmege sýretshiniń 70-ke jýyq eńbegi qoıylǵan
Almatyda tanymal sýretshi Kámil Mýllashevtyń jeke kórmesi ashyldy, dep habarlaıdy Almaty-akshamy.kz Almaty.tv-ge silteme jasap.
Beıneleý óneriniń túrli baǵytyn qamtyǵan óner týyndylary «Ýaqyt úni» dep ataldy. Sýretshiniń aıtýynsha, bulaı atalýy da beker emes. Sebebi kópshilik nazaryna usynylǵan kartınalar sońǵy jyldary elimizde, jalpy álemde bolǵan jaǵdaılardan syr shertedi. Máselen «Covid-19», «Ómir úshin kúres» dep atalatyn týyndylary kóptiń nazaryn eriksiz aýdartady. Kórmege sýretshiniń 70-ke jýyq eńbegi qoıylǵan. Avtor bulardyń barlyǵyn sońǵy 3 jyldyqta qaǵaz betine túsiripti.
«Dáýirimizdi, jaqyn adamdardyń portretin, ózimniń fılosofıalyq oıymdy beıneleıtin sýretterim arqyly ishki oıymdy bildirgim keldi», – dedi QR Eńbek sińirgen qaıratkeri, sýretshi Kámil Mýllashev.
Kámil Mýllashev shyǵarmalarlarynyń negizgi ıdeıasy – adam ómiriniń qundylyǵy men rýhanıaty. Sheberdiń myńnan astam kartınasy bar. Ábilhan Qasteev atyndaǵy Memlekettik óner mýzeıindegi kórme 7 qazanǵa deıin jalǵasady. Kelip tamashalaımyn degen qala turǵyndary men qonaqtary úshin murajaı kún saıyn tańǵy saǵat 10:00-dan keshki 18:00-ge deıin úzilissiz jumys isteıdi.
«Adamnyń mineziniń ózgerýi, nemquraılylyǵyn kúlkili ıronıalyq tilde jetkizgen shyǵarmalary da bar. Sondaı-aq portrettik týyndylary da kóp. Olar – Qazaqstannyń Eńbek sińirgen qaıratkerleri men belgili tulǵalar bar», – dedi Á. Qasteev atyndaǵy memlekettik óner mýzeıiniń bólim jetekshisi Sandýǵash Myrzabekova.