Toyota Camry kóligimen taksı qyzmetin usynǵan almatylyqqa shabýyl jasaldy.
Oqıǵa bıyl 12 naýryzǵa qaraǵan túni Túrksib aýdanynda bolǵan. Júrgizýshiniń tanystary bul jaıly áleýmettik jelilerde baıandaǵan, dep habarlaıdy Almaty-akshamy.kz QazAqparatqa silteme jasap.
«Tapsyrys túsken. Klıentterdi áýejaıǵa aparý kerek bolǵan. Júrgizýshi shaqyrǵan orynǵa kelgen, shabadandar men sómkeleri bar adamdardy kólikke otyrǵyzǵan. Bári tynysh otyrǵan, kólik Shyǵys aınalma jolymen júrgen. Sodan keıin júrgizýshi Buqtyrma kóshesine burylǵan. Ekobeket mańynda klıentter «Nurshashqan» shaǵynaýdany arqyly júrýin suraǵan. Olar jolda kólikti toqtatýyn ótinip, sol kezde klıentterdiń biri júrgizýshige 6-7 ret pyshaq suǵyp alǵan. Ary qaraı jospar boıynsha júrgizýshini sol jerde qaldyryp, kólikti aıdap áketken», - dep jazdy avtor.
Júrgizýshi aýrýhanada jatyr, onyń jaǵdaıy birqalypty. Kólik pen qylmyskerler áli tabylmaǵan. Bul birinshi jaǵdaı bolmaýy múmkin degen boljam bar. Almaty qalalyq polısıa departamentiniń málimetinshe, atalǵan derek Qylmystyq kodekstiń 192-baby 4-bóligi boıynsha tirkeldi.
«Túrksib aýdandyq polısıa bólimi osy qylmystyq isti tergep jatyr. Arnaıy jedel tergeý toby quryldy, onyń quramyna qalanyń krımınaldyq polısıa qyzmetkerleri kirdi. Olar kúdiktilerdi ustap, qylmystyq jaýapkershilikke tartýǵa baılanysty tekseris júrgizedi. Almaty PD basshylyǵy tergeý barysyn baqylaýǵa aldy», - dedi vedomstvonyń baspasóz qyzmeti ókili.