Kóptegen jyldar boıy qant dıabetimen aýyratyn 55 jastaǵy áıel dıabettik taban sındromyna shaldyqqan.
Pasıentke 2-tıptegi qan dıabeti, aıaqtaǵy kúretamyrlardyń aterosklerozy degen dıagnoz qoıylǵan, dep habarlaıdy Almaty-akshamy.kz №4 Qalalyq klınıkalyq aýrýhananyń baspasóz qyzmetine silteme jasap.
Habarlamaǵa súıensek, operasıa barysynda aıaqtaǵy kúretamyrlarǵa angıografıa jasaldy. Nátıjesinde tizeniń astyndaǵy jáne úlken jilinshiktegi arterıalardyń tarylyp, stenoz paıda bolǵany anyqtaldy. Aıaqtaǵy arterıalarǵa angıoplastıka jasaldy, qan aınalymy tolyq qalpyna keltirildi, deıdi mamandar.
Ota jańa ádis boıynsha jasaldy. Operasıany qalalyq klınıkalyq aýrýhanada ótken sheberlik klasy sheńberinde Úndistannyń Mýmbaı qalasynan kelgen dáriger Gırısh Mýkýd jasady.
«Ádette mundaı jaǵdaıda syrqattyń aıaǵyn kesip tastaıdy. Bul áıeldiń joly boldy, endi hırýrgıalyq operasıa jasaýǵa qajettilik joq», - deıdi aýrýhananyń Rentgen-endovaskýlárlyq hırýrgıa bólimi dárigeri Kamıla Orazbaeva.
Úndistandyq dáriger Gırısh Mýkýdtyń aıtýynsha, engizilip otyrǵan jańa ádis – ıntervensıondyq nemese endovaskýlárlyq hırýrgıa – zaqymdanǵan aǵzany skalpelsiz, qan tamyry arqyly rentgenendovaskýlárlyq ádispen emdeýge múmkindik beredi.
Sheberlik klasy barysynda úndistandyq dárigerdiń qatysýymen osyndaı taǵy 4 ota jasaldy.
Medısınalyq saqtandyrý qorynyń Almaty fılıaly dırektory Tileýhan Ábildaevtyń sózine súıensek, tórt ota da mindetti áleýmetik medısınalyq saqtandyrý sheńberinde qarjylandyryldy.
«Bir jyl buryn №4 Qalalyq kınıkalyq aýrýhanada rentgen-endovaskýlárlyq hırýrgıa bólimshesi ashylǵan bolatyn. Osy ýaqyt ishinde mıdaǵy qan tamyrlaryna 739 ıntervensıondyq ota men jatyr arterıalaryn embolızasıalaý syndy manıpýlásıalar júzege asyrylǵan. Bul operasıalardyń bári de MÁMS paketi sheńberinde jasaldy», - dedi Tileýhan Ábildaev.