Sınoptıkter jańbyr saǵat keshki 17-18-ge deıin aıaqtalatynyn boljady.
Almatylyq mamandar 24 maýsym kúni jaýyn-shashyn túsken kezdegi komýnaldyq qyzmetterdiń qalaı jumys istegenin aıtty, dep habarlaıdy Almaty-akshamy.kz.
2022 jylǵy 24 maýsymda saǵat 14:30-dan bastap Almaty qalasynda nóser jaýyn jaýa bastady.
«Sý basýdyń aldyn alý jáne joıý maqsatynda merdigerlik uıymdardyń kezekshiligi uıymdastyryldy. Sýdy kedergisiz ótkizilýin qamtamasyz etý boıynsha jumystardy júrgizý úshin, jalpy sany 682 adam, 245 birlik arnaıy tehnıka jáne 24 motopompa jumyldyryldy. 1950 qap qum daıyndaldy», - delingen arnaıy qyzmet habarlamasynda.
«Qazgıdromet» RMK boljamy boıynsha, jańbyr saǵat keshki 17-18-ge deıin aıaqtalady. Erteń 25 maýsym kúni jaýyn-shashyn bolmaıdy.