Óńirlik komýnıkasıalar qyzmetiniń baspasóz konferensıasynda QR Ulttyq ekonomıka mınıstrligi Tabıǵı monopolıalardy retteý komıtetiniń Almaty qalasy boıynsha departamentiniń tabıǵı monopolıalar men baǵalardy retteý bóliminiń basshysy Ardaq Jańabaeva resýrs únemdeýdi yntalandyrý boıynsha jańa sharalardy - tutynýdyń áleýmettik normalaryn engizý jobasyn usyndy, dep habarlaıdy aqshamnews.kz.
«Sý resýrstaryn tutyný mádenıetin arttyrý jáne tutynýshylardy sýdy jáne jylýdy únemdeýge yntalandyrý úshin tabıǵı monopolıalar týraly zańnamaǵa «tutynýdyń áleýmettik normalary» uǵymy engizildi. Olar «neǵurlym kóp únemdeseńiz, soǵurlym az tóleısiz» qaǵıdaty boıynsha sýmen jabdyqtaý jáne jylýmen jabdyqtaý qyzmetterin tutyný kólemine baılanysty joǵary tarıfterdi belgileýge baǵyttalǵan», - dep atap ótti spıker.
Onyń aıtýynsha, sýmen jabdyqtaýda tarıfterdiń tórt deńgeıli júıesi qoldanylady: 3 m³ deıin - aǵymdaǵy tarıf; 3 - ten 5 m³ deıin - +20%; 5-ten 10 m³ deıin - +50%; 10 m³ joǵary jáne eseptegish bolmaǵan jaǵdaıda-qos tarıf.
Sonymen qatar, jylytý úshin normalar turǵyn úıdiń aýdany boıynsha esepteledi: 100 m² deıin - bekitilgen tarıf; 100 - den 200 m² deıin - +10%; 200 m² joǵary-ortasha tarıf.
Ardaq Jańabaeva saralanǵan tarıfter arqyly túsetin qosymsha qarajat turǵyn úı-kommýnaldyq sharýashylyǵyn jańartý isine jumsalatynyn aıtty. Atap aıtqanda, ınjenerlik jeliler jańartylyp, resýrs únemdeıtin tehnologıalar engiziledi jáne esepteý qurylǵylary ornatylady.
Spıkerdiń aıtýynsha, qazirgi ýaqytta «Almaty Sý» (3,3 mlrd teńgege) jáne «Almaty jylý júıesi» (83 mln teńgege) ınvestısıalyq baǵdarlamalardy ózgertýge ótinishter qaralýda.
«Bul sharalar ınfraqurylymdy damytyp qana qoımaı, turǵyn úı kómegi esebinen az qamtylǵan otbasylardy ataýly túrde qoldaýǵa múmkindik beredi», - dep atap ótti Jańabaeva.