Baspasóz týry barysynda Almaty qalasy Ekologıa jáne qorshaǵan orta basqarmasynyń mamandary BAQ ókilderine sý basý oryndaryn joıý boıynsha júrgizilip jatqan apattyq qalpyna keltirý jumystaryn kórsetti. "Taýsamaly" shaǵynaýdanynda uzyndyǵy 980 m quraıtyn Oıjaılaý ózeniniń arnasyn bekitý jumystary júrgizildi. Raıymbek dańǵylynda 1400 metrlik sýy aǵyzý jelisi salynyp jatyr. Tóle bı men Iassaýı kósheleriniń qıylysynda ótkizý qabiletin arttyra otyryp, uzyndyǵy 150 m quraıtyn aryq jelisi jóndeldi. Sonymen qatar jýrnalıser Raıymbek dańǵylynan Qarasý kóshesine deıingi úzyndyǵy 2200 m kolektordyń jóndeý jumystarymen jáne jalpy uzyndyǵy 3360 m quraıtyn Momyshuly kóshesinen Chýlanov kósheleriniń Jubanov kóshesinen Rysqulov dańǵylyna deıingi aralyǵyndaǵy ótkizý kanalynyń qurylys jumystarymen tanysty.
Buǵan deıin qala ákiminiń tapsyrmasy boıynsha Ekologıa jáne qorshaǵan orta basqarmasynyń mamandary jaýyn kezinde sý basatyn oryndardy anyqtaý jumystaryn júrgizgen bolatyn.
Barlyǵy 102 sý basý orny anyqtalyp, onyń ishinde 56 aýmaq boıynsha shuǵyl túrde apattyq qalpyna keltirý jumystaryn júrgizý qajet ekendigi anyqtaldy. Negizgi másele – jaýyn-shashyn jelisiniń joqtyǵy, káriz jelisine qosylmaǵan, qoqysqa tolǵan jáne bitelgen aryqtar men kolektorlar. Jumys barysynda jalpy uzyndyǵy 1,5 myń shaqyrym aryq jelisiniń boıy 1464 jerde tuıyqtalǵandyǵy, al 16 kolektordyń 12-si isten shyqqandyǵy belgili boldy.
Qazirgi kezde únemi sý basatyn 25 aýmaqta jumystar aıaqtaldy: Áıteke bı kóshesi boıynda Nazarbaev, Abylaı han dańǵyldary, Panfılov, Qonaev kósheleriniń qıylysy; Tóle bı men Iassaýı kósheleriniń qıylysy; Jarokov-Sátbaev, Sátbaev-Baıtursynov, ál-Farabıden Remızovkaǵa burylys; "Tastybulaq", "Qalqaman" shaǵynaýdandary. Sondaı-aq Áýezov aýdanyndaǵy bir kanal men Jetisý, Alataý aýdandaryndaǵy 4 kolektor jóndeldi.
Ekologıa jáne qorshaǵan orta basqarmasy mamandarynyń aıtýy boıynsha, sý basýdyń taǵy bir sebebi – sý aǵyzý qubyrlary dıametriniń sý aǵynynyń kúshine sáıkes kelmeýi.
«Qazirgi tańda qalada dıametri 500 mm sý aǵyzý qubyrlary paıdalanylady. Olar kelip túsken sý kólemin ıgere almaıdy. Osy máseleni sheshý maqsatynda dıametri 1 mm quraıtyn qubyrlar ornatylyp jatyr. Osylaısha, sý aǵyzý qubyrlarynyń ótkizý qabileti eki esege artyp otyr», - dedi Ekologıa jáne qorshaǵan orta basqarmasy basshysynyń m.a. Serik Ádilbaev.
Jyl sońyna deıin qalǵan 31 sý basý ornyn joıyp, 8 kolektor men 3 kanaldy jóndeý josparlanǵan.