Qalada sý tasqyny jaǵdaıyna qatty jaýyn-shashyn týraly daýyldy eskertýden keıin azamattyq qorǵaý kúshteri aıaqtan tik turǵyzyldy, dep habarlaıdy Almaty-akshamy.kz.
Saǵat 10:30-daǵy jaǵdaı boıynsha Almatyda "112" jelisi men "109" qutqarý qyzmetine úı aýlasy men kóshelerdi sý basýǵa baılanysty 11 habarlama kelip tústi.
Oqıǵa ornyna TJ basqarmasynyń jaýapty ınspektorlary bardy, sý basqany jónindegi jeti habarlama rastalmady.
Jetisý aýdanynda Goncharov kóshesinde TJD qyzmetkerleri bitelip qalǵan aryq qubyryn tazalady.
Alataý aýdanyndaǵy Magadanskaıa kóshesindegi merdigerlik uıymnyń kúshimen aryq jelisi tazartyldy.
Naýryzbaı aýdanynda Suranshy batyr kóshesinde jeke úıdiń aýlasyn sý basyp, oqıǵa ornynda ákimdikke qarasty merdigerlik uıymynyń qyzmetkerleri jumys istedi.
Túske deıin sý basý boıynsha barlyq rastalǵan jaǵdaılar boıynsha júrgizilgen jumystar aıaqtaldy.
27 naýryzda keshki saǵat 21:00-den tańǵy 09:00-ge deıin Almatyda 23 mm jaýyn-shashyn tústi. Aıdyń basynan beri túsken jaýyn-shashynnyń kólemi - 146,1 mm, al aılyq qalypty norma 76 mm bolady.
"Qazseldenqorǵaý" MM baqylaý beketteriniń derekteri boıynsha, Kishi jáne Úlken Almaty, Aqsaı, Qarǵaly ózenderiniń baseınderinde jaǵdaı turaqty. Sý deńgeıiniń kóterilýi baıqalmaıdy.