Almaty ákimi Darhan Satybaldy qaladaǵy jetekshi joǵary oqý oryndarynyń rektorymen kezdesti. Jańa oqý jylyna daıyndyq, jastar tárbıesi, jataqhanadaǵy jaǵdaı, ekologıalyq bilim berý jáne ǵylymdy damytý jaıy talqylandy.
Búginde Almatyda elimizdiń barlyq joǵary oqý ornynyń úshten biri shoǵyrlanǵan, onda 200 myńnan astam stýdent oqıdy. Bul qalanyń joǵary zıatkerlik áleýetin qalyptastyrady ári qala bıliginiń júıeli qoldaýyn qajet etedi.
«Biz ákimdik tarapynan stýdentterdiń jataqhanada turyp oqýyna jaǵdaı jasaýǵa tyrysamyz. Eń bastysy, bárimiz birge – ákimdik, joǵary oqý oryndary men qoǵam jastardy tárbıeleýge, olardyń boıyna eńbek mádenıetin sińirýge, jaýapkershilikti, qalaǵa degen qurmetti qalyptastyrýǵa tıispiz», - dedi Darhan Satybaldy.
Kezdesý barysynda qala basshysy ákimdik janynan ǵylym jáne tehnologıalar jónindegi Qalalyq keńestiń qurylǵanyn eske saldy. Keńes quramyna ýnıversıtet ókilderi kiredi.
«Almatynyń ǵylym arqyly damýyna yqpal etetin ıdeıalardy iske asyrý - bizdiń ortaq mindetimiz», - dedi ákim.
Almatynyń túrki memleketteri jastarynyń astanasy mártebesine erekshe nazar aýdaryldy. Jyl aıasynda joǵary oqý oryndarynyń qoldaýymen mádenı jáne bilim berý is-sharalary ótedi.
«Mundaı mártebege ıe bolý joǵary qurmet pen úlken jaýapkershilik. Bul mısıany bárimiz birge laıyqty júzege asyryp jatqanymyzǵa senimdimin», - dedi ákim.
Rektorlar bilim berýdi jańǵyrtýdan bastap ekologıalyq bastamalarǵa qatysýǵa deıingi máseleler boıynsha baıandama jasap, oı-pikirin bildirdi. Stýdenttik kampýstardaǵy jaǵdaıdy jaqsartý, ınjenerlik jáne pedagogıkalyq bilim berýdi damytý, jastardyń halyqaralyq jáne qalalyq jobalarǵa qatysýy jóninde usynystar aıtyldy.
Stýdentterdiń ómir súrý sharttary jeke blokta talqylandy. Ákim jataqhanalardyń jaǵdaıyn tekserýdiń birinshi kezeńi bastalǵanyn, ekinshi kezeń tamyz aıyna josparlanǵanyn aıtty. Bilim berý jumysyn uıymdastyrý jáne stýdentterdiń qalalyq bastamalarǵa qatysýy mańyzdy baǵyt bolyp tanyldy.
Ákim stýdentterge qoldaý bildiretin daǵdarys ortalyǵyn, sondaı-aq qalada ahýaldyq ortalyqty iske qosý josparlary týraly aıtty. Bul ortalyqtar stýdentter ótinishine der kezinde nazar aýdaryp, áleýmettik qaterdiń aldyn alady.
«Stýdentter qala ómirine atústi emes, júıeli túrde - senbilikten bastap qoǵamdyq bastamalarǵa deıin qatysýǵa keńinen tartylýy kerek. Sol kezde jaýapty ári belsendi urpaq qalyptastyra alamyz», - dep sózin túıindedi Darhan Satybaldy.