Memleket basshysynyń Qazaqstanda sheteldik joǵary oqý oryndarynyń fılıaldaryn ashý jónindegi tapsyrmasyn iske asyrý aıasynda QR Ǵylym jáne joǵary bilim mınıstrligi Fransıanyń jetekshi ınjenerlik mektebi – Grenoble INP – Phelma, UGA ýnıversıtetimen 2026 jyly Satbayev University bazasynda fransýz tehnıkalyq ýnıversıtetiniń fılıalyn ashý týraly kelisimge qol jetkizdi, dep habarlaıdy aqshamnews.kz
Kelisimge qol qoıý rásimi QR Ǵylym jáne joǵary bilim mınıstri Saıasat Nurbektiń jáne Fransıanyń Qazaqstandaǵy elshisi Sılvan Gıogeniń qatysýymen ótti. Qujatqa eki ýnıversıtettiń vıse-prezıdentteri – Gúlgen Alpan (Grenoble INP – Phelma, UGA) jáne Samǵat Ermekbaev (Satbayev University) qol qoıdy.
Grenoble INP – Phelma, UGA – Eýropadaǵy ıadrolyq tehnologıalar salasyndaǵy eń iri ǵylymı-zertteý jáne óndiristik klasterlerdiń biri. Ýnıversıtet ıadrolyq fızıka, elektronıka jáne materıaltaný salalarynda aldyńǵy qatarly bilim beredi. Onyń ınjenerlik baǵdarlamalary THE jáne QS halyqaralyq reıtıń agenttikteri tarapynan joǵary baǵalanǵan.
Satbayev University bazasyndaǵy Grenoble INP – Phelma, UGA fılıalynda ıadrolyq ınjenerıa jáne jańartylatyn energıa salasyna qajetti joǵary bilikti mamandardy daıarlaý maqsatynda 3+1 formatyndaǵy qos dıplomdy bilim berý baǵdarlamalary iske qosylady. Baǵdarlamalar Nuclear Engineering, Renewable Engineering jáne Advanced Studies sıaqty suranysqa ıe mamandyqtardy qamtıdy.
Atalǵan baǵdarlamalar Qazaqstanda alǵashqy atom elektr stansıalaryn salý kezeńinde asa ózekti bolyp otyr. Baǵdarlamaǵa qatysatyn stýdentter Fransıadaǵy AES-terde tájirıbeden ótý múmkindigine ıe bolady. Bul eldegi 56 ıadrolyq reaktor ulttyq energetıkalyq balanstyń 70%-dan astamyn qamtamasyz etedi. Osylaısha, túlekter otandyq energetıka nysandarynda jumys isteýge daıyn, joǵary bilikti ári tájirıbege beıimdelgen mamandar bolady.