Almaty qalasy, Almaty jáne Jetisý oblystary boıynsha QAJ departamentiniń Almaty qalasyndaǵy №11 jáne Zarechnyı aýylyndaǵy №14 mekemelerindegi jalpy bilim beretin mektepterdi bitirýshi sottalǵandary arasynda Ulttyq biryńǵaı testileýdi tapsyrýdyń tártibi men joldaryn túsindirý maqsatynda arnaıy mamandarmen kezdesý uıymdastyryldy, dep habarlaıdy Almaty-akshamy.kz Polisia.kz-ke silteme jasap.
Kezdesý barysynda Almaty qalasy boıynsha adam quqyqtary jónindegi ýákildiń ókili M. Maldybaev, Almaty qalasy boıynsha adam quqyqtary jónindegi ulttyq ortalyqtyń bas mamany K. Sıbaǵatova jáne QR Ǵylym jáne Joǵary bilim mınıstrligi “Ulttyq testileý ortalyǵy” RMQK Almaty qalasyndaǵy fılıaly basshysynyń mindetin atqarýshy N.M. Álibıeva sottalǵandarǵa biryńǵaı ulttyq testileýdi tapsyrý men joǵary bilim alýdyń joldaryn túsindirdi.
«Búgingi tańda №11 mekemedegi mekteptiń 11-synybynda 11 sottalǵan bala oqysa, №14 mekemedegi mekteptiń 11-synybynda 12 sottalǵan bilim alyp jatyr. Eger olar UBT tapsyryp, shekti bal alsa, joǵary bilim alýǵa múmkindikteri bar. Bul oraıda atalǵan mekemelerdiń ákimshiligi Q. Satpaev atyndaǵy Qazaq Ulttyq tehnıkalyq zertteý ýnıversıtetiniń Kásibı damý jáne sandyq tehnologıalar ınstıtýtynyń dırektory A.G. Sımonovpen kezdesip, atalǵan mekemelerdegi sottalǵandardy onlaın-oqytýǵa qol jetkizý máselelerin talqylaǵan bolatyn. Qazirgi tańda KDjST ınstıtýty Qazaqstandaǵy jalǵyz onlaın oqytatyn joǵary bilim orny», – deıdi QAJD sottalǵandar arasyndaǵy áleýmettik psıhologıalyq tárbıe jumysy bóliminiń bas mamany Sh.Hýsaınova.
Sonymen qatar QR ǴjJBM “Ulttyq testileý ortalyǵy” RMQK Almaty qalasy boıynsha fılıalynyń ókili N.M. Álibıeva sottalǵandarǵa UBT tapsyrýdyń tártibi týraly slaıd kórsetip, olardyń suraqtaryna jaýap berdi.