Asqartaý shaǵyn aýdany Jansaıa kóshesi 17B mekenjaıdaǵy qulyptalǵan úı buzyldy. Bul týraly Almatynyń Qala qurylysyn baqylaý basqarmasynan habarlady.
Buryn jospardan tys tekserý nátıjeleri boıynsha menshik ıesine qatysty ruqsat qujattary tolyq paketiniń bolmaýyna baılanysty ákimshilik sharalar qabyldandy jáne buzýshylyqtardy joıýǵa nusqama berildi.
Nusqama merzimi aıaqtalǵannan keıin basqarma Almaty qalasynyń Bostandyq aýdandyq sotyna buzýǵa talap aryz berdi. 2024 jylǵy 2 mamyrda Almaty qalalyq sotynyń qaýlysymen birinshi satydaǵy sot buzý týraly sheshim ózgerissiz qaldy. Keıin Ádilet Departamentinde atqarýshylyq is qozǵaldy.
Nysandy bólshekteý sot oryndaýshylarynyń qatysýymen bastaldy.
Esterińizge sala keteıik, Almaty ákimi Erbolat Dosaevtyń qurylysqa baqylaýdy kúsheıtý jónindegi tapsyrmasy aıasynda 2023 jyldyń basynan beri 72 zańsyz nysan, onyń ishinde «Mechta», KHAN jáne basqa da turǵyn úı keshenderi tolyǵymen nemese ishinara buzylǵan.