Sońǵy kezderi qoǵamdyq kólikterdiń qatysýymen jol apattary jıi bola bastady. Búgingi oqıǵa jolaýshy júrgizýshige qol jumsap sonyń saldarynan bolyp otyr. Júrgizýshi qaýipsizdigine kim jaýap beredi? Almaty-akshamy.kz tilshisi ótkenge oı júgirtip, qoǵamdyq kóliktiń qatysýymen bolǵan oqıǵalardy salmaqtap kórdi. Sonymen:
Ótken jyly 8 qarashada qara halyqtyń jaǵasyn ustatqan iri jol kólik oqıǵasy oryn aldy. Almatyda Astana alańynyń mańynda N201 jáne N98 baǵyttaǵy eki avtobýs soqtyǵysty. Saldarynan bir adam qaza tapty. Sońǵy málimetter boıynsha, toǵyz adam aýrýhanaǵa jatqyzyldy. Onyń bireýi – bala. Polıseıler №98 avtobýs júrgizýshisi baǵdarshamnyń tyıym salynǵan belgisine qaramaı jol aıyryǵyna shyqqan.
Osy jol apatynan bir saǵattan soń Abaı dańǵyly boıynda Seıfýllın dańǵyly men Baıtursynov kósheleri aralyǵynda batys baǵytta troleıbýs pen avtobýs soqtyǵysty. İshki ister mınıstrliginiń málimetinshe, avtobýs sol jaq jolaqqa túspek nıette burylǵanda BMW kóligimen soqtyǵysqan. Ábúıir bolǵanda eshkim zardap shekpedi.
Al №23 avtobýstyń kórer qyzyǵy bar eken. 31 qazanda Raıymbek pen Saına kósheleriniń qıylysynda qoǵamdyq kóliktiń tejegishi isten shyǵyp ketedi. Júrgizýshiniń tájirıbeliligi bolar avtobýsty joldan alyp shyǵyp, aǵashtyń arasyna toqtatady.
Rıhard Zorge kóshesinde №2 avtobýs áıeldi qaǵyp ketken. Oqıǵa 27 qyrkúıekte oryn aldy. Kósheniń kelesi betine ótýdi kózdegen jolaýshyny júrgizýshi baıqamaǵan. Ýaǵynda jetken jedel járdem jolaýshynyń ómirin saqtap qala almady.
25 qyrkúıekte Marǵulan men Momyshuly kósheleriniń qıylysynda №112 avtobýstyń qatysýymen bolǵan oqıǵa saldarynan úsh bala zardap shekti. Munda da qoǵamdyq kóliktiń tejegishi isten shyqqan. Al 16 shildede Soltústik aınalma kóshesinde №27 avtobýs qaqqan jolaýshy ártúrli jaraqat aldy. Endi ómir boıy ol osy jaraqattan japa shegetin bolar.
8 naýryzda Avangardnyı qıylysynda jaıaý júrginshiler jolaǵymen ótip bara jatqan jolaýshyny soqqan. Soqqy saldarynan on metrge ushyp túsken azamat sol jerde kóz jumdy. Oǵıǵaǵa №33 avtobýs júrgizýshisi tikeleı kináli dep tabyldy. Al 1 aqpanda oryn alǵan oqıǵa Jansúgirov pen Jumabaev kósheleriniń qıylysynda bolǵan. Kýágerlerdiń aıtýynsha, avtobýs júrgizýshisi baǵdarshamnyń qyzyl túsine ótip, jol erejesin óreskel buzǵan.
Almaty polısıa departamentiniń málimetinshe, YUTONG BUS avtobýsynyń júrgizýshisi Raıymbek dańǵylynyń boıymen shyǵys baǵytta kele jatqan. Qashyqtyqty saqtamaý saldarynan ol alǵa qaraı kele jatqan SAZ avtobýsymen soqtyǵysqan. Soqqynyń áserinen SAZ avtobýsy sol baǵytta kele jatqan úshinshi YUTONG avtobýsymen soqtyǵysqan. Abyroı bolǵanda eshkim zardap shekken joq. Bul oqıǵa 11 aqpanda oryn alǵan edi.
Al bıylǵy jyldyń 2-aqpanynyń tańynda Ál-Farabı dańǵyly men Jarokov kóshesiniń qıylysynda, "Qazaqfılm" kınostýdıasyna qarama-qarsy jerde eki avtobýs soqtyqty. №31 baǵyttaǵy avtobýs №116 kishirek qoǵamdyq kóliktiń artqy jaǵynan soqqan. Soqqydan №116 avtobýstyń artqy áınegi synǵan. Alty adam ártúrli dene jaraqatyn aldy.
Jyl saıyn avtobýstardyń qatysýymen qansha apat oryn alady? Sońǵy úsh jyldaǵy Qazaqstandaǵy jol-kólik oqıǵalarynyń statısıkasy avtobýstardyń qatysýymen bolǵan jol-kólik oqıǵalarynyń joǵary deńgeıde qalyp otyrǵanyn kórsetedi.
• 2019 j. – 543 jol-kólik oqıǵasy (81 qaza jáne 949 jaraqat alǵan);
• 2020 j. – 327 jol-kólik oqıǵasy (29 qaza jáne 455 jaraqat);
• 2021 jyl – 379 jol-kólik oqıǵasy (38 qaza jáne 487 jaraqat alǵan).
• 2022 jyldyń 8 aıy – 198 jol-kólik oqıǵasy (21 qaza jáne 339 jaraqat alǵan).
Eske salaıyq, búgin - 2023 jylǵy 22 jeltoqsanda 18 saǵat 15 mınýtta 47-baǵyttaǵy qoǵamdyq kóliktiń (jeke tasymaldaýshy - «DýmanTransKom» JSHS) jolaýshysy janjal saldarynan júrgizýshi áıeldi urǵan. Saldarynan ol esin joǵaltyp, kólikti basqara almaı qalǵan.