Qazir sotqa deıingi tergeý bastaldy.
Almatyda 55 myńnan asa elektrondy temeki zańsyz satylǵan, dep habarlaıdy Almaty-akshamy.kz
Qarjylyq monıtorıń agenttiginiń málimetinshe, vedomstvonyń Almaty qalalyq departamenti prokýratýranyń úılestirýimen elektrondy temekini (veıp) zańsyz kóterme saýdalaý qyzmetiniń jolyn kesken. Jedel-izdestirý is-sharalary barysynda qalada elektrondy temekini zańsyz kóterme satqan saýda jáne qoıma úı-jaılary anyqtaldy.
«Tintý kezinde jalpy somasy 80 mln teńgeden asatyn 55 myńnan asa elektrondy temeki tabylyp, tárkilendi. Qazir sotqa deıingi tergeý bastaldy», dedi QMA resmı ókili Ádil Ábilov.
QR QPK 201-babynyń talaptaryna sáıkes, ózge málimetter jarıa etýge jatpaıdy.
Sondaı-aq agenttik ókili veıpterdi qoldaný jasóspirimderdiń damýyna keri áserin tıgizetinin, este saqtaý, zeıindi shoǵyrlandyrý, ózin-ózi baqylaý jáne oqý qabiletine zıandy áser etetinin eske saldy. Ata-analardan balalardyń minez-qulqyna, densaýlyǵyna jáne onyń ne satyp alatynyna nazar aýdarýdy surady.