Forým jumysyna QR Energetıka vıse-mınıstri Janat Jahmetova qatysty. Ol Qazaqstan Úkimeti tarapynan energetıka salasyn sıfrlandyrýǵa jáne qazaqstandyq qamtýdy damytýǵa erekshe nazar aýdarylyp otyrǵandyǵyn atap ótti, dep habarlaıdy Almaty-akshamy.kz Egemen.kz-ke silteme jasap.
«TSHO-nyń sıfrlandyrýǵa degen syndarly kózqarasynyń tabysty bolýy IT mamandary jumysynyń bıznes-mindetterdi sheshýge baǵyttalýynda bolyp otyr. Biz bul forým otandyq IT kompanıalar men jer qoınaýyn paıdalanýshylardyń arasyndaǵy yntymaqtastyqty jolǵa qoıýǵa septigin tıgizedi dep úmittenemiz», - dedi Janat Jahmetova.
Kompanıa mamandary forým qatysýshylaryna Teńiz ken ornynda sátti engizilgen ınovasıalyq tehnologıalar týraly aıtyp berdi. Máselen, TSHO-nyń barlyq avtokólik parki kólik qaýipsizdigi ıntellektýaldy júıesimen qamtylǵan. Ol dybystyq sıgnal berý arqyly júrgizýshiniń sharshaý deńgeıin baqylaýǵa múmkindik beredi. Bul óz kezeginde jazataıym oqıǵalardy azaıtýǵa jáne qyzmetkerler qaýipsizdigin qamtamasyz etýge yqpal etedi.
2020 jyly Keshendi tehnologıalar jelide (KTJ) vırtýaldy zaýyt (Virtual Plant) sheshimi kómegimen naqty ýaqyt rejıminde búkil zaýyttaǵy baqylaý-ólsheý jabdyqtarynynyń derekteri biriktirildi. Nátıjesinde suıytylǵan kómirsýtekti gaz (SKG) óndirisi kólemi ulǵaıtyldy. Sıfrlyq tehnologıalardy qoldaný arqyly Teńizde SKG óndirisin ulǵaıtý ORES+ shekteýleriniń ornyn toltyrýǵa kómektesti. Sonymen qatar qıyndyqtardy múmkindikterge aınaldyrýǵa, sıfrlyq sheshimder arqyly qundylyqty qurý tizbegin ońtaılandyrýǵa jáne ózgeristerge jyldam áreket etýge múmkindik berdi.
Sondaı-aq kásiporyn qazaqstandyq qamtýdy damytý jónindegi mamandary TSHO qamtýshysy bolý úshin, IT kompanıalar qandaı qadamdar jasaý kerektigine toqtaldy. Forýmda TSHO-nyń tehnıkalyq (tehnıkalyq menedjer, .NET ázirleýshileri, DevOps ınjenerleri, QA testerleri) jáne tehnıkalyq emes (ózgeristerdi basqarý mamandary, bıznes-analıtıkter (Business Analyst, Proxy Product Owners), ári Low Code ázirleýshileri(PowerApps, PowerBI) rólderin oryndaýǵa qabiletti AT mamandardy qabyldaýǵa múddeli ekendigi aıtyldy.
«Qazaqstandyq qamtýdy arttyrý – TSHO-nyń basym baǵyttarynyń biri. Biz úshin otandyq kompanıalarmen birge jumys jasap, olardyń damýyna kúsh-jiger jumsaý mańyzdy. Bizdiń maqsatymyz – AT mamandarynyń úlesin barynsha arttyrý. sebepti forým qarsańynda «Sıfrly Teńizshevroıl – 2022» atty Hakaton sharasyn ótkizdik. Berilgen máseleniń ońtaıly sheshimin tapqan komandalar TSHO-men kelisim-shartqa otyrý múmkindigine ıe boldy», - dep atap ótti TSHO-nyń sıfrlandyrý boıynsha chempıony Marat Qýatov.
Aıta ketetin jáıt, Hakatonǵa Qazaqstannyń túkpir-túkpirinen 30-ǵa jýyq komanda qatysty. Qazylar alqasy músheleriniń biri, TSHO-nyń sıfrlandyrý jónindegi keńesshisi Azıdolla Qısmetovtyń aıtýynsha: «Sheshim ǵana emes, sonymen qatar kompanıanyń jalpy daıarlyǵy men quzyrettiliginiń deńgeıi baǵalandy».