Almatylyqtarǵa Ábish Kekilbaevtyń povesi negizinde túsirilgen «Shyńyraý» fılmi tanystyryldy, dep habarlaıdy Almaty-aqshamy.kz.
Almatyda «Shyńyraý» fılminiń tusaýkeseri ótti. Kınotýyndynyń senarıin rejıser Jańabek Jetirýovtyń ózi jazǵanyn aıta ketý kerek. Fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen.
«Fılm 10-nan astam halyqaralyq kınofestıvaldiń konkýrstyq baǵdarlamasyna qatysyp baǵasyn alǵanmen, eldegi premerasy pandemıaǵa baılanysty keıinge shegerilgen edi. Sonyń reti búgin kelip otyr», - deıdi jazýshynyń nemeresi Abyl Kekilbaev.
Ábish Kekilbaevtyń «Shyńyraý» povesi jelisi boıynsha túsirilgen kartına qudyq qazýshy Eńseptiń oqıǵasyn baıandaı otyryp, adamǵa tán menmendik, baqtalastyq, mahabbat, pen dostyq, qastandyq syndy jaǵymsyz qasıetteriniń perdesin ashady. Negizgi oı Ústirt jazyǵynda qudyq qazýdy kásip etken eki qarapaıym qudyqshynyń arasyndaǵy báseke arqyly jetkiziledi.
Eldiń batasyn alýdy maqsat tutyp, baıyrǵy kásipti básekeniń kózine aınaldyrǵan Eńsep aqyry sol baqtalastyqtyń qurbanyna aınalady.
«Fılm adamnyń óz maqsatyna jetý úshin ómir-baqı eńbektenetinin, biraq ol óz múmkindiginiń qaı jerde sarqylatynyn sezbeı, shekten asyp ketip, óz armanynyń qurbanyna aınalatynyn kórsetedi», - deıdi Abyl Kekilbaev.
Fılmniń túsirilimderi Mańǵystaý oblysynda ótýi de tegin emes-ti. Kartınada Qaraqıa oıysy, Ústirt shoqysy men Kaspıı teńizi kórinis tabady.
Negizi poves 1982 jyly jaryq kórgen. Sodan beri 2009 jylǵa deıin birneshe kıno mamany ony ekranǵa shyǵarýǵa nıettengenimen, sáti túspegen kórinedi.
«2009 jyly «Qazaqfılm» kınostýdıasynyń sol kezdegi prezıdenti Ermek Amanshaevtyń uıytqy bolýymen Ábish atamnyń povesin ekranǵa shyǵarý boıynsha naqty jumys bastaldy. Bul jumys Jańabek Jetirýovqa tapsyryldy. Ol kisi poves avtorymen birneshe ret kezdesip, senarıdiń alǵashqy nusqasyn ózine maquldatqan bolatyn. Ókinishke qaraı, atamyz fılmdi túsirý jumystary bastalǵanyn kórmeı ketti. 2019 jyly Astanada «Eýrazıa» Halyqaralyq kınofestıvaliniń baǵdarlamasynda «Shyńyraý» fılmi alǵash ret kórsetildi», - deıdi Ábish Kekilbaevtyń nemeresi.
Sol alǵashqy kórsetilimnen bastap fılm 10-nan astam halyqaralyq festıválge qatysyp úlgergen.
Týyndynyń akterlik quramyna kelsek, negizgi rólderdi Qazaqstannyń eńbek sińirgen qaıratkeri Aldabek Shalbaev, belgili teatr jáne kıno akteri Muhamedjan Myrzakeev, «Daryn» jastar syılyǵynyń ıegeri Asylhan Tólepov oınaıdy.