Almaty qalasy memlekettik arhıvinde Qazaqstannyń eńbek sińirgen qaıratkeri, İ dárejeli «Barys» jáne «Parasat» ordenderiniń ıegeri, «Frans Kafka atyndaǵy Altyn medal» syılyǵynyń, «Platına Tarlan» syılyǵynyń, «Halyqtyń súıiktisi» ulttyq syılyǵynyń laýreaty, aqyn Shómishbaı Sarıevtiń qurmetine «Dúnıeni jalt qaratsam dep edim...» atty mýzeı-buryshy ashyldy.
Saltanatty is-sharaǵa Almaty qalasy ákiminiń orynbasary Arman Qyryqbaev, aqynnyń jubaıy Jumakúl Sarıeva, sondaı- aq jaqyndary, dostary men zıaly qaýym ókilderi qatysty.
«Qazaq halqyn jarty ǵasyrdaı ánimen terbegen ulttyń asa kórnekti aqyny Shómishbaı Naǵashybaıulyn bilmeıtin qazaq joq shyǵar. Búgingi is-sharanyń mańyzy joǵary, ári óziniń baqılyq bolǵan kúnine sáıkes kelip otyr. Máńgilik ómiri halyqtyń júreginde, dál osy arhıv ǵımaratynda jalǵasa beretinine senimdimiz. Ol ańyz adam edi. Artynda mol dúnıe qaldyrdy. Qazaqtyń mańdaı aldy, kúmis kómeı, jez tańdaı óner juldyzdary shyrqap júrgen talaı ándi shyǵarǵan. Halyq aýzynda júrgen kóptegen áni osy aqynnyń qalamynan shyqqan. Qazaqtyń rýhyn kóterýge, mýzykalyq talǵamyn, ishki mádenıetin qalyptastyrýǵa aıryqsha eńbek sińirgen bolatyn. Dál osy sebepti aqynnyń bul arhıvte turǵan eńbekteri úlken qundylyqqa ıe», – dedi Arman Orazbaıuly.
Iá, Almaty qalasynyń memlekettik arhıvinde №650 bolyp tirkelgen buryshtyń mańyzy erekshe. Mýzeı-buryshyna Shómishbaı Naǵashybaıulynyń qundy qujattary, eńbekteri, óziniń qoldanǵan jeke zattary qoıylyp otyr. Osy oraıda aqynnyń jubaıy Jumagúl Sarıeva da sóz aldy.
«Bul kún men úshin erekshe, ári tarıhı kún bolyp otyr. Alǵash 2014 jyly osy arhıvke qundy qoljazbalaryn, baǵaly qujattaryn tapsyrǵan bolatynmyn. Osy ýaqyt arasynda 135-ke jýyq zatyn tapsyrdym. Onyń ishinde otyzǵa jýyq kitaby qoıylǵan. Qoldanǵan jeke zattarynyń qatarynda shapanyna deıin bar. Aldaǵy ýaqytta da tolyqtyratyn bolamyn. Shómishbaıdy halyq «Qos qanatty aqyn» dep atap ketken. Bir qanaty – poezıa bolsa, ekinshi qanaty – án janry. Qanshama jyl ótse de onyń jazǵan ánderi halyq aýyzynan túsken emes. Meniń asúıimde tańerteńnen Qazaq radıosy oınap turady, sol jerden Shómishbaıdyń ánimen orazamdy asham desem de bolady. Keleshek urpaq úshin mańyzy joǵary osyndaı buryshty ashýǵa qoldaý kórsetken Almaty qalasynyń ákimdigine rızashylyǵymdy bildiremin», – dedi aqyn jary.
Almaty qalasy memlekettik arhıvtiń jınaqtaý bóliminiń basshysy Naǵıma Nuǵmanova da buryshtyń mańyzdylyǵyn atap ótti. Al QR Memlekettik syılyǵynyń ıegeri, Halyq artısi Maqpal Júnisova aqynnyń sózine jazylǵan ándi shyrqap, qulaq quryshyn qandyrdy.
«Meniń de óner jolymdaǵy baǵymdy ashqan osy kisiniń ánderi edi. Repertýarymda Shómishbaı aǵanyń sózine jazylǵan otyzǵa jýyq án bar. Ol ánderdi áli de sahnada shyrqap júmin. Bundaı uly tulǵanyń ánin shyrqap júregenimdi maqtan tutamyn. Biz Shómishbaı Naǵashybaıulyn eshqashan da umytpaımyz», – dedi ánshi.