Almatyda Medeý aýdanynyń sıfrlyq keńsesinde «Sheksiz óner» jańa art-jobasynyń aıasynda «Sheksiz álem» komıksiniń kórmesi ashyldy. Jobanyń bastamashylary – Almaty Sreative kreatıvti ındýstrıalardy damytý ortalyǵy men Medeý aýdanynyń sıfrlyq keńsesi.
Fransýz alánsy usynǵan «Sheksiz álem» komıksiniń kórmesi ekspresıvti vızýaldy til arqyly bizdiń planetamyzdyń ekologıasy men bolashaǵy týraly máseleni kóteredi. Kórmeniń adam aıaǵy kóp júretin Halyqqa qyzmet kórsetý ortalyǵynda ashylǵany quptarlyq. Onda kezek kútip otyrǵan adamdar ýaqytyn bosqa ótkizbeı, bir sát ǵalamdyq máselege kóńil aýdaryp, oǵan kórmede usynylǵan sýretter arqyly úńiletin bolady.
Almaty Sreative kreatıvti ındýstrıalardy damytý ortalyǵy men Medeý aýdanynyń sıfrlyq keńsesi bir ǵımaratta ornalasqan, ıaǵnı bir-birine kórshi. Sondyqtan olar nıet, tilek, kúsh biriktirip, osyndaı «Sheksiz óner» bastamasyn birge qolǵa alyp otyr. Bul óner men tehnologıa, memlekettik qyzmetter men shyǵarmashylyq ındýstrıalar ózara árekettesýdiń jańa formattaryn qura otyryp, bir-birimen qatar ómir súrip, tolyqtyra alady degen ıdeıanyń tabıǵı jalǵasy ispettes deıdi uıymdastyrýshylar.
– «Sheksiz álem» álbomy áıgili fransýz komıks avtory Krıstof Blen men klımat salasyna mamandanǵan Jan-Mark Jankovıchıdiń tanystyǵynyń nátıjesinde paıda bolǵan. Bul komıks klımattyń ózgerýiniń sebepteri men saldaryn tereń ári jeńil túrde baıandaıdy. 2021 jyly jaryq kórgen sátten bastap úlken jetistikke jetken komıks búginde birneshe tilge aýdarylyp, 2022 jyly Fransıada 500 myń danamen satylyp, bestseller atandy.
Fransıa ınstıtýty bul komıksti ekologıalyq kórmege aınaldyrý týraly sheshim qabyldap, nátıjesinde Fransýz alánsy men Almaty Creative kreatıvti ındýstrıalardy damytý ortalyǵy birlesip búgingi kórmeni usyndyq. Bul kórme komıkstiń negizgi taqyryptaryn – energetıka men klımat týraly ózekti taqyrypty qozǵaıdy, – deıdi joba jetekshisi, Almaty Creative kreatıvti ındýstrıalardy damytý ortalyǵy Salalyq damý departamentiniń basshysy Sholpan Mahmýdova.