Almatyda búgingi kúni 9 152 «Sergek» kamerasy jumys isteıdi. 2021 jyldan 2024 jyldyń shildesine deıingi kezeńde qalada jol apattarynyń sany 17%-ǵa, al kólik apattary saldarynan jaraqat alǵandar sany 30%-ǵa azaıǵan. Sonymen qatar, joldaǵy ólim kórsetkishi 40%-ǵa tómendedi. Bul týraly qalalyq sıfrlandyrý basqarmasynyń basshysy Oljas Janabek málim etti, dep habarlaıdy aqshamnews.kz
«Sergek» júıesiniń iske qosylýynan beri Almatynyń búdjetine 44,08 mıllıard teńge tústi. Júıe qalada jol qozǵalysynyń qaýipsizdigin arttyrýǵa jáne quqyq buzýshylyqtardy baqylaýǵa baǵyttalǵan, sonymen qatar ol joldaǵy tártipti jaqsartýǵa, apattardyń sanyn azaıtýǵa septigin tıgizdi.
Sońǵy jyldary «Sergek» júıesi Almatydaǵy jol qaýipsizdigin aıtarlyqtaı jaqsartty. Kameralardyń kómegimen tirkelgen quqyq buzýshylyqtar sany 3 mıllıonnan asqanymen, júıeniń tıimdiligi de baıqalady. Kameralar tek jyldamdyqty asyrýdy ǵana emes, sondaı-aq jol erejelerin buzý sıaqty basqa da zańbuzýshylyqtardy tirkeıdi. Bul, óz kezeginde, qaladaǵy jol qozǵalysynyń tártibin saqtaýǵa úlken áser etedi.
Júıeniń mańyzdy artyqshylyqtarynyń biri – statısıkanyń dáldigi men únemi jańartylyp turatyn aqparattardyń bolýy. Megapolıstiń barlyq kóshelerine ornatylǵan kameralar joldaǵy tártipti baqylaýdy jeńildetip, azamattardyń quqyq buzýshylyqtaryn der kezinde anyqtaýǵa múmkindik beredi.