Jıynǵa palata tóraǵasy Aıdos Sarym jetekshilik etip, Májilis vıse-spıkeri Danıa Espaeva men bıznes-qoǵamdastyq ókilderi qatysty, dep habarlaıdy aqshamnews.kz.
Olar jańa Salyq kodeksiniń jobasyn talqylady.
Aıdos Sarym Memleket basshysy qyrkúıektegi Joldaýynda salyq zańnamasy máselelerin Úkimet pen Parlamentte jan-jaqty talqylap, qajetti sheshimder shyǵarýdy tapsyrǵanyn eske saldy.
Qyrkúıek aıynan bastap Májilis jańa Salyq kodeksiniń jobasyn ázirlep jatyr. Depýtat túzetý engize bermeıtin, bolashaqta turaqty jumys isteıtin kodeksti qabyldaý mindeti turǵanyn atap ótti.
Jańa Salyq kodeksi jobasynyń negizgi baǵyttary týraly Ulttyq ekonomıka vıse-mınıstri Azamat Ámrın, Qarjy mınıstrligi Memlekettik kirister komıteti tóraǵasynyń orynbasary Jánibek Nurjanov aqparat berdi.
Talqylaý barysynda Májilis depýtaty, kodeks jobasy boıynsha jumys tobynyń jetekshisi Berik Beısenǵalıev, sarapshylar Erlan Smaıylov pen Natalá Malárchýk, bıznes-qoǵamdastyq ókilderi men sarapshylar óz usynystarymen bólisti. Atap aıtqanda, «Atameken» UKP Basqarma tóraǵasynyń orynbasary, Basqarma múshesi Tımýr Járkenov áleýmettik sala uıymdary, medısına, sondaı-aq turǵyn úı jyljymaıtyn múlikti bastapqy satý boıynsha qurylys salýshylar úshin qosymsha qun salyǵynan bosatý jeńildikterin saqtaýdy usyndy.
Jıyn barysynda kásipkerlerdiń de pikirleri tyńdaldy. Aıtylǵan usynystar Salyq kodeksiniń jobasy boıynsha aldaǵy jumys barysynda Májiliste qaralatyn bolady.
Jıyn sońynda vıse-spıker Danıa Espaeva jalpy Salyq kodeksiniń jobasyn talqylaýǵa jáne jıynǵa belsene qatysqany úshin memlekettik organdar men bıznes ókilderine alǵysyn bildirdi. Ol óz sózinde búdjet tapshylyǵy máselesine toqtalyp, ony tolyqtyrý ádisteriniń biri – salyq bazasyn ulǵaıtý ekenin atap ótti.