Daýys berý pýnkti repýblıkalyq Dostyq úıinen ashyldy.
Búgin Almaty qalasynda QR Parlamentiniń Senatyna depýtattar saılaýy ótti. Saıası is-sharaǵa qalalyq máslıhat depýtattary, qalanyń aýmaqtyq saılaý komısıasy músheleri, kandıdattardyń senim bildirilgen adamdary, saıası partıalar men qoǵamdyq birlestikterdiń baıqaýshylary, sondaı-aq buqaralyq aqparat quraldarynyń ókilderi de qatysty, dep habarlaıdy Almaty-akshamy.kz
Daýys berý pýnkti respýblıkalyq Dostyq úıinen ashyldy. Tańdaýshylarǵa kandıdattar jaıly aqparattar berý úshin olar týraly málimetter men sýretter biryńǵaı formatta daıyndalyp, daýys berý pýnktine kire beristegi stendterge ilingen.
Saılaýǵa Almaty qalasynan joǵary palataǵa saılanatyn bir senatorlyq oryn úshin ózin-ózi usyný jolymen tórt kandıdat qatysty. Barlyǵy – áıel azamattar. Almaty qalasynyń saılaý komısıasy zań talaptary sheńberinde Qazaqstan Respýblıkasy Parlamenti Senatynyń depýtattyǵyna kandıdat retinde «Almaty memlekettik servıs jáne tehnologıalar koleji» MKQK dırektory Janıazova Jarqyn Lepesqyzyn, «Youthart» QQ dırektory Bekmýrzaeva Krıstına Iýrevnany, Almaty qalasy Jetisý aýdanynyń ákimi Kókebaeva Gúlnar Ahmetjanqyzy men «Almaty qalasyn damytý ortalyǵy» AQ Basqarma tóraǵasynyń keńesshisi Asanova Janna Beısentaıqyzyn tirkegen bolatyn.
Olardyń bireýi - memlekettik komýnaldyq kásiporynnyń qyzmetkeri, bir kandıdat - memlekettik qyzmetshi, bireýi - komersıalyq qurylymdardyń qyzmetkeri jáne taǵy bireýi - qoǵamdyq uıym ókili. Mamandyqtary boıynsha: 2 zańger, 1 ınjener, 1 óner salasynyń mamany, atap óterligi, bir kandıdattyń eki mamandyǵy bar. Úmitkerlerdiń ortasha jasy - 45.
Tańdaýshylardyń birlesken otyrysynan keıin Almaty qalasy máslıhatynyń 38 depýtatynyń 37-ci janama saılaý quqyǵy negizinde jasyryn daýys berdi. Daýys berý aıaqtalǵannan keıin aýmaqtyq saılaý komısıasy birden olardy sanap, hattama toltyrdy.
Daýys berý nátıjelerin Almaty qalasy saılaý komısıasynyń tóraǵasy Aıgúl Qalyqova jarıalady. Almaty qalasynan Qazaqstan Respýblıkasy Parlamenti Senatynyń depýtattyǵyna saılaý boıynsha kandıdattar J.Asanova 23, G.Kókebaeva 8, K.Bekmýrzaeva 3, J.Janıazova 2 daýys aldy. Bir depýtat bárine qarsy daýys berdi.
Daýys berýdiń nátıjeleri týraly hattama Ortalyq saılaý komısıasyna jóneltildi. Sondaı-aq bekitilgen reglamentke sáıkes, daýys berýdiń aldyn ala qorytyndylary týraly málimetter Qazaqstan Respýblıkasy Ortalyq saılaý komısıasynyń elektrondy fýnksıonalyna engizildi.