Elimizde 15-23 aqpan aralyǵynda saýda nysandarynda órt qaýipsizdigin saqtaý boıynsha respýblıkalyq aksıa ótkizildi.
Almaty qalasy Tótenshe jaǵdaılar departamentiniń ókilderi Óńirlik komýnıkasıalar qyzmetiniń brıfıńinde aksıanyń qorytyndysyn shyǵardy, dep habarlaıdy Almaty-akshamy.kz.
Aksıa aıasynda megapolıste 120-dan astam profılaktıkalyq reıd júrgizildi. Saýda obektilerin jalǵa alýshylarǵa 2000 adamdy qamtı otyryp, órt qaýipsizdigi talaptary túsindirildi, 2800-ge jýyq jadynama taratyldy.
Departamenttiń esebinde barlyǵy 215 saýda nysany bar, onyń ishinde 174-i SOSO, 40-y bazar, 1-ýi japsarlas saýda nysany. Ótken jyly 37 nysanda tekserý júrgizilip, nátıjesinde órt qaýipsizdigi talaptarynyń 700 buzýshylyǵy anyqtaldy.
«Nusqamalardy oryndamaǵany úshin mamandandyrylǵan aýdanaralyq ákimshilik sotqa QR ÁQtK 462 - babynyń 3-bóligi boıynsha bir materıal jiberildi, qyzmetin toqtatýsyz 690 myń teńge somaǵa aıyppul túrinde ákimshilik jaýapkershilikke tartyldy», - dedi Almaty qalasy Tótenshe jaǵdaılar departamenti Memlekettik órt baqylaý basqarmasy basshysynyń orynbasary Erkebulan Jumataev.
Sonymen qatar, «Kenjehan» jáne «Sálem» bazarlaryna jospardan tys tekserýler júrgizildi, olardyń nátıjeleri boıynsha 30 buzýshylyq anyqtaldy. Jiberilgen quqyq buzýshylyqtar úshin bıznes ıeleri eskertý aldy.
Qalǵan 174 saýda nysany moratorıı men jańa retteýshi saıasatqa baılanysty tekserilmegen.
TJD habarlaýynsha, ótken jyly saýda nysandarynda 24 órt tirkelgen, zardap shekkender men qurbandar joq.
Jýrnalıserdiń suraqtaryna jaýap bere otyryp, E. Jumataev bıznesmenderdiń órtke qarsy qaýipsizdik normalaryn buzylýyna jıi jol beretinin aıtty.
«Negizinen, bizde avtomatty órt dabylynyń durys jumys istemeýi, olardyń bolmaýy, evakýasıa joldarynda janǵysh materıaldardy, qaldyqtardy, qaptamalardy saqtaý, sondaı-aq alǵashqy órt sóndirý quraldarynyń bolmaýy sıaqty buzýshylyqtarǵa jol beriledi. Biraq bul «Qaýipsiz saýda» aksıasy saýda sýbektilerine órt qaýipsizdiginiń qarapaıym erejelerin ákimshilik áserinsiz túsindirý úshin tek profılaktıkalyq sıpatta bolady», - dep jaýap berdi ol.
Sondaı-aq, maman órt bolǵan jaǵdaıda saýda ortalyqtaryna kelýshilerge qalaı áreket etý kerektigi týraly keńes berdi.
«Órt bolǵan jaǵdaıda úreıge boı aldyrmaý kerek jáne evakýasıalaý nusqaýlary men josparlaryna sáıkes áreket etý kerek. Birinshiden, órt týraly órt sóndirý bólimine habarlaý, sondaı-aq ǵımarat ákimshiligine, adamdarǵa habarlaý. Ári qaraı qaýipti aımaqtan shyǵyp, órt sóndirý bólimshelerin kútý kerek», - dedi E.Jumataev.
Almaty qalasy Tótenshe jaǵdaılar departamenti memlekettik órt baqylaý basqarmasynyń bas mamany Daryn Muqanov atap ótkendeı, saýda nysandaryndaǵy órtterdiń negizgi sebebi elektr symdarynyń qysqa tuıyqtalýy bolyp jatady.
Sońynda mamandar turǵyndardy órt qaýipsizdigi erejeleriniń talaptaryn saqtaýǵa shaqyrdy jáne bıznes ıelerine ózderin yqtımal órtterden qalaı qorǵaý kerektigi týraly usynystarmen bólisti:
- evakýasıalyq joldarǵa toltyryp tastamaý (bógemeý);
- órt dabyly júıesiniń jumys jaǵdaıyn baqylap otyrý;
- órt qaýipsizdigin qamtamasyz etýge jaýapty tulǵalardy taǵaıyndaý;
- órt gıdranttary men órt krandarynda sýdyń joǵary qysymyn qamtamasyz etý.