Almatyda saýda jáne tutynýshylar quqyǵyn qorǵaý departamentiniń 2025 jyldyń birinshi toqsanyndaǵy jumysy qorytyndylandy. Osy kezeńde vedomstvo azamattardyń 2 myńnan astam ótinishin qarap, 20 jospardan tys tekserý júrgizip, tutynýshylarǵa 45 mln teńgeden astam qarjyny qaıtaryp berdi. Bul týraly Almaty qalasy óńirlik komýnıkasıalar qyzmetiniń baspasóz konferensıasynda departament basshysynyń orynbasary Nýrlan Abdıev málim etti, dep habarlaıdy .
«Ótinishterdiń basym bóligi bólshek jáne elektrondyq saýda salasynda kelip túsedi. Sondaı-aq qoǵamdyq tamaqtaný salasynda da shaǵymdar bar», - dedi spıker.
Onyń aıtýynsha, tekserý nátıjesinde úsh aıda 61 ákimshilik jaza qoldanylǵan.
Negizgi buzýshylyqtar taýarlardy qaıtarýdan nemese aıyrbastaýdan bas tartýmen, shaǵymdarǵa ýaqtyly jaýap bermeýmen jáne baǵa saıasatyn buzýmen baılanysty.
Sondaı-aq, Nýrlan Abdıev departamenttiń áleýmettik mańyzdy azyq-túlik taýarlaryna baǵa belgileý máselelerimen belsendi aınalysatynyn atap ótti. Osy jumys sheńberinde birinshi toqsanda komısıanyń 6 otyrysy ótkizilip, onda 226 buzýshylyq anyqtalyp, joıyldy. Josyqsyz kásipkerlerge qatysty 212 ákimshilik hattama jasaldy.
«Biz naryqty baqylaýdy, tutynýshylardyń quqyqtaryn qorǵaýdy jáne saýda jáne azamattardyń quqyqtaryn qorǵaý týraly zańdardy túsindirýdi jalǵastyramyz», - dep basyp aıtty ol.
Tekseristerden basqa, vedomstvo BAQ jáne áleýmettik jelilerde belsendi túsindirý jumystaryn júrgizedi, sondaı-aq halyqtyń quqyqtyq mádenıetin arttyrý úshin qoǵamdyq uıymdarmen ózara is-qımyl jasaıdy.